Shivattvaratnakara 36.27

36.27

bahunātra kimuktena mayā tatraiva gamyate
tatra sthitānāṃ siddhānāṃ yathābhilaṣitaṃ dadat
nivasiṣyāmi devyasmiṃstavānu matirasti cet
tvamapi triṣu lokeṣu māteti bahughokṣyase
saṃhṛtya mūkanāmānaṃ dānavaṃ bahudarpitam
ihaiva vasa mūkāmbetyākhyāṃ prāptavatī satī
ityuktvā'ntardadhe devaśśaṃkaro lokaśaṃkaraḥ
tathā vidhāya tannāmnā khyātā'vartata tatra sā
vayasastambhanaṃ kālavañcanaṃ mṛtajīvanam
pādukāyāstathā siddhirdṛśyakaraṇaṃ tathā
parakāyapraveśaśca siddhistaddhanmaṇerapi
mantrasiddhistataḥ siddhirauṣadhasyeti siddhayaḥ
ityevamādikāssiddhīrmūkāmbāyāḥ prasādataḥ
1) saṃprāpya tatra tiṣṭhaṃti yogino mokṣakāṃkṣiṇaḥ
bruve tāsāṃ ca siddhīnāṃ svarūpāṇi śṛṇu kramāt
kṛṣṇapakṣe 2) trayodaśyāṃ sandhyāyāṃ śālmalidrumam
balipūjādikaṃ kṛtvā raktasūtrāṇi veṣṭayet
oṃ hāṃ tatomṛtasyaṃdinyamṛtaṃ srava tatparam
svāhetyanena mantreṇa saptavāraṃ tu śālmalim
abhimantrya kuṭhāreṇa nihanyādbahuśassudhīḥ
tasya niryāsamādāya prabhāte bhāskarodaye
prācyāṃ bhṛṅgaśatāvaryā guḍūcyā svarasaiḥ pṛthak
saptavāraṃ pratirasaṃ tena bhāvanamācaret
saṃpiṣyolūkhale kuryād guṭikā badaraissamāḥ
prativāsaramekaikāṃ dhārayed guṭikāṃ tataḥ
ahnāṃ dvisaptake yāte dantakeśanakhaṃ patet
punardvisaptake yāte nūtanā radanā nakhāḥ
saṃbhavaṃti tataḥ keśā bhṛṅgapakṣasamatviṣaḥ
dvayaṣṭavarṣākṛtirdṛśyo balavīryasamanvitaḥ
samāsahasrajīvī syānnātra kāryā vicāraṇā
mūlatvakphalapuṣpāṇi patramityaṃgapañcakam
āhṛtya śālmalitaroḥ sūkṣmaṃ cūrṇaṃ tu kārayet
madhunā sarpiṣā yuktaṃ biḍālapadamātrakam
tallihetprātarutthāya māsamekaṃ mitāśanam