Shivattvaratnakara 36.44

36.44

māsena 1) jāyeta naro valīpalitavarjitaḥ
māsametatprayogeṇa mattebhasadṛśo bhavet
jīvatyabdasahasrāṇi tejasvī taruṇākṛtiḥ
nīrogo vīryasampanno jāyate nātra saṃśayaḥ
sitāṃ raktāṃ ca pītāṃ ca kṛṣṇāṃ muṇḍīṃ caturvidhām
pañcamyāṃ kṛṣṇapakṣasya paurṇamāsyāṃ tu vā niśi
rohiṇyāṃ śravaṇe puṣye revatyāṃ vā samuddharet
pañcāṃgāni samāhṛtya cchāyāyāṃ pariśoṣayet
sarpiṣā madhunā sārdhaṃ biḍālapadamātrakam
taccūrṇamupayuṃjīta kṣīrapiṣṭakabhojanaḥ
ekaviṃśe dine yāte divyadeho bhavennaraḥ
māsatrayaprayogeṇa loke prāpnotyadṛśyatām
pañcamāsaprayogeṇa modate vibudhaissaha
māsaṣaṭkaprayogeṇa cirāyuḥ khecaro bhavet
amarīṃ puṣyanakṣatre samūlāṃ pallavānvitām
ādāya śoṣayitvātu ślakṣṇaṃ taccūrṇamācaret
sarpiṣā madhunā sārdhaṃ bhakṣayetkarṣamātrakam
gavyakṣīrasamāyuktaṃ kuryātsvalpānnabhojanam
saptāhe prathame yāte vigalanti rujarasphuṭam
prāpte dvitīyasaptāhe divyadeho bhavennaraḥ
tṛtīye bhūtalasthāni nidhānānyapi paśyati
caturthe ṣaṭpadānīlā jāyante'sya śiroruhāḥ
samāsahasratritayaṃ jīvettāruṇyasaṃyutaḥ
gandharvatvaṃ pañcame syād gandhavāhasamāgatiḥ
ṣaṣṭhe vācaspatiprakhyaḥ prajñāvān jāyate naraḥ
saptame pūrṇacandrābhassarvāhlādakaro bhavet
aṣṭame sarvasattvānāṃ pīyūṣaṃ vitaratyasau
saptadvīpādhipatyaṃ ca navame saptake bhavet
bhūtaṃ bhavyaṃ bhaviṣyacca daśame vetti saptake
aśrutānyapi śāstrāṇi jānātyekādaśe naraḥ
dvādaśe saptake prāpte dvitīya iva manmathaḥ
vaśīkaroti sarvāṇi naranārīmanāṃsyapi
saṃvatsaropayogena samālakṣatrayaṃ sukhī
jarāpalitamuktāṃgo jīvatyeva na saṃśayaḥ