Shivattvaratnakara 70.25

70.25

vyatyāso naiva phaladaḥ puṃvajreṇa vinā kvacit
aindraṃ ṣaḍaśrayuktaṃ yāmyaṃ sarpāsyarūpamasitaṃ ca
kadalīkāṇḍanikāśaṃ vaiṣṇavamiti sarpasaṃsthānam
vāruṇamabalāguhyopamaṃ bhavetkarṇikārapuṣpā-bham
śṛṅgāṭakasaṃsthānaṃ vyāghrākṣinibhaṃ ca hautabhujam
vāyavyaṃ ca yavopamamaśokakusumaprabhaṃ samuddiṣṭam
raktaṃ pītaṃ kapiśaṃ rājanyānāṃ sitaṃ dvijātīnām
śārīṣaṃ vaiśyānāṃ śūdrāṇāṃ śasyate'sinibham
ibhāhikiṭimatsyānāṃ śīrṣe muktāphalodgamaḥ
tvaksāraśuktiśaṅkhānāṃ garbhe muktāphalodbhavaḥ
dhārādhareṣu jāyeta mauktikaṃ jalabindubhiḥ
durlabhaṃ tanmahāratnaṃ devaistatnīyate 'mbarāt
gajādijaṃ suduṣprāpaṃ mauktikaṃ tapasā vinā
mauktikaṃ śuktijaṃ labhyamākareṣu kalau nṛbhiḥ
kukkuṭāṇḍasamaṃ vṛttaṃ mauktikaṃ nibiḍaṃ guru
ghanajaṃ bhānusaṅkāśaṃ devayogyamamānuṣam
kāmbojakumbhisaṃbhūtaṃ dhātrīphalanibhaṃ samam
ātāmrapiñjaracchāyaṃ mauktikaṃ mandadīdhiti
phaṇijaṃ vartulaṃ ramya nīlacchāyaṃ mahādyuti
puṇyahīnā na paśyanti vāsukeḥ kulasambhavam
kolajaṃ cāṅkolanibhaṃ taddaṃṣṭrāsadṛśacchavi
alabhyaṃ manujai ratnaṃ puṇyasampadvivarjitaiḥ
guñjāphalasamasthūlaṃ nibiḍaṃ mauktikaṃ laghu
pāṭalīpuṣpasadṛśaṃ matsyajaṃ syātsuvartulam
vaṃśajaṃ śaśisaṅkāśaṃ mañjālīphalamātrakam
prāpyate bahubhiḥ puṇyaistadrakṣyaṃ vedamantrataḥ
puruṣottamasacchāyaṃ pāñcajanyakulodbhavam
kapotāṇḍapramāṇaṃ yacchāntaṃ doṣaharaṃ param
vidrumābhalatāyukto yasya pāre'sti parvataḥ
śaraccandrasamābhāsasamuttuṅgataṭaṅgayuk
yasya velāmbudheśśuklā mahāmakarasaṅkulā
evaṃ lakṣaṇasaṃyukte sāgare mauktikodbhavaḥ
siṃhalakrapāralaukikasaurāṣṭrakatāmraparṇipāraśikāḥ
kauverapāṇḍyavāṭakasaṃjñā muktākarāstvaṣṭau