Shivattvaratnakara 70.42

70.42

bahusaṃsthānā snigdhā haṃsābhāssiṃhalaśiśarasthūlāḥ
kṛṣṇāḥ śvetāḥ pītāśśarkarakāḥ pāralaukikā viṣamāḥ
na sthūlā nātyalpā navanītanibhāśca saurāṣṭrāḥ
jyotiṣmantaśśubhrā guravo'timahāguṇāśca pārasikāḥ
laghubarbarā dadhinibhāśśaṅkhanibhāśca tāmraparṇibhavāḥ
bimbaphalatripuṭākṛtiyuktāḥ khyātāstu pāṇḍyavāṭabhavāḥ
atasīkusumaśyāmaṃ vaiṣṇavamaindraṃ śaśāṅkasaṅkāśam
haritālanibhaṃ vāruṇamabhrābhaṃ yāmyadaivataṃ bhavati
pariṇatadāḍimakalikāguñjātāmraṃ ca vāyudaivatyam
nirdhūmānalakamalaprabhakāntaṃ vahnidaivatyam
iti varṇāssamākhyātā devatābhedataḥ kramāt
śuktijanmāmbudhermadhye siddhe caivāravāyake
pāraśīke macchale ca bhavenmuktāphalaṃ śubham
svātyāṃ sthite ravau meghairya muktā jalabindavaḥ
te śuktau patitā muktā jāyante nirmalatviṣaḥ
sthūlā madhyāstathā sūkṣmā bindumānānusārataḥ
bhavanti muktāstāsāṃ ca maulyaṃ tanmānamāpataḥ
rugmiṇyākhyā bhavecchuktistato jātaṃ ca mauktikam
nirmalaṃ kuṃkumacchāyaṃ jātīphalasamākṛti
amūlyaṃ tadvinirdiṣṭaṃ ratnalakṣaṇavedibhiḥ
durlabhaṃ nṛpayogyaṃ tat svalpapuṇyairna labhyate
snigdhaṃ sumadhuracchāyaṃ mauktikaṃ sitamuttamam
śuktigarbhasamutpannaṃ pītacchāyaṃ sunirmalam
catvārassyurmahādoṣāḥ pañca madhyāḥ prakīrttitāḥ
mauktikasya ca ratnasya nava doṣān parīkṣayet
śuktikhaṇḍaṃ ca paruṣaṃ matsyākṣaṃ cātiraktatām
mahādoṣāṃśca caturastyajellakṣaṇavinmaṇau
trivṛttaṃ capaiṭaṃ tryasraṃ dīrghapārśvaṃ ca yatkṛśam
sāmānyāḥ pañca doṣāḥ syū ratnaśāstraparīkṣiṇām
madhupītasitatvaṃ ca chāyā sā trividhā matā
hlādi śvetaṃ guru snigdhaṃ raśmimannirmalaṃ mahat
khyātaṃ toyaprabhaṃ vṛttaṃ mauktikaṃ navalakṣaṇam
mauktikaṃ viśadaṃ vṛttaṃ sitaṃ śrīdaṃ suśītalam
sadā sudhākaraprītimāvahed dhāraṇena tu