Shivattvaratnakara 70.93

70.93

adhivāsena māṇikye varṇotkarṣaḥ prajāyate
nīlaṃ tu dvividhaṃ proktaṃ ratnasiddhāntaśāsane
jalanīlendranīle ca śakranīlaṃ tayorvaram
śvetagarbhitanīlābhaṃ laghu tajjalanīlakam
kārṣṇyagarbhitanīlābhaṃ sugātraṃ śakranīlakam
indranīlasya sambhūtissiṃhaladvīpamadhyataḥ
siddhāvaraṇajñāyāḥ kūle padmākarāntare
sitacchāyo bhavedviprastāmraḥ kṣatriyajātimān
pītastu vaiśyajātīyovṛṣalaḥ kṛṣṇadīdhitiḥ
doṣāṃstasya pravakṣyāmi nāmabhirlakṣaṇaiśca ṣaṭ
guṇāṃśca kathayiṣyāmi pañca cāṣṭavidhāṃ chavim
abhravatpaṭalaṃ yattu tadabhramamitadyuti
dhāraṇaṃ tasya sampattimāyuścaiva samaṃ haret
śarkarāmiśritaṃ yattu tadvijñeyaṃ saśarkaram
tasmin dhṛte śarīrātirdehatyāgaśca jāyate
bhedasaṃśayakṛdyattu tena daṃṣṭribhayaṃ bhavet
bhinnaṃ bhinnamiti jñeyaṃ bharturbhāryāṃ vināśayet
mṛttikā yasya garbhasthā lakṣyate ratnakovidaiḥ
mṛttikāgarbhakaṃ nāma taddoṣajanakaṃ bhavet
dṛṣat pratyak patedyasya garbhe nīlasya kovidaiḥ
aśmagarbhaṃ tadākhyātaṃ 1) tadvarṇaparibhūtikṛt
gurutvaṃ snigdhakāntitvaṃ surāgaṃ pārśvaṃrañjanam
tṛṇagrāhitvamityete guṇāḥ pañca prakīrttitāḥ
nīlīrasasamā bhāsā vaiṣṇavīpuṣpasannibhā
lavalīpuṣpasaṅkāśā nīlendīvarasaprabhā
atasīpuṣpasaṅkāśā cāṣapakṣasamadyutiḥ
kṛṣṇāgakarṇikāpuṣpasamānadyutidhāriṇī
mayūrakaṇṭhasacchāyetyevaṃ chāyāṣṭadhā smṛtā
doṣaistyakto guṇairyukta indranīlo mahāmaṇiḥ
yasya hastaṃ vaśe tasya vittamāyurbalaṃ yaśaḥ
ekacchāyaṃ guru snigdhaṃ svacchaṃ piṇḍitavigraham
mṛdu madhyollasajjyotissamadhā nīlamuttamam
komalaṃ nihataṃ varṇaṃ sibhāraṃ raktagandhi ca
capiṭābhaṃ varūkṣaṃ ca jalanīlaṃ ca saptadhā
yasya madhyagatā bhāti nīlasyendrāyudhaprabhā