Shivattvaratnakara 76.78

76.78

aṣṭālakoṣṭaphalakaḥ ṣaṭkoṇo masṛṇo guruḥ
śuddhamiśritavarṇaiśca yukto vaikrānta ucyate
śveto raktaśca pītaśca nīlaḥ pārāvatacchaviḥ
śyāmalaḥ kṛṣṇavarṇaśca karburaścāṣṭamaḥ smṛtaḥ
purāmṛtakaṇā devi! patitā devatāmukhāt
śukrāste vimalāḥ proktāssarvakarmakarā varāḥ
vividhāste maheśāni! hemādyāstārapūrvikāḥ
anyaśca kāṃsyavimalo ratnasiddhāntaśāsane
vartulaḥ koṇasaṃyuktastiryakkuphalakānvitaḥ
pūrvo hemakriyāyukto dvitīyo raupyakṛnmataḥ
tṛtīyo bheṣaje teṣu pūrvaḥ pūrvo guṇādhikaḥ
mākṣikam
kṛṣṇāpādatale viddhe vyādhena mṛgaśaṅkayā
tatra ye patitā bhūmau kṣatādrudhiravindavaḥ
te nimbaphalasaṅkāśā jātā mākṣikagolakāḥ
mākṣiko dvividho hemamākṣikastāramākṣikaḥ
tatrādyo mākṣikaḥ kanyākubjotthassvarṇasannibhaḥ
tataḥ patirasaṃ bhūtaḥ pañcavarṇasuvarṇavat
pītvā hālāhalaṃ tadvadamṛtaṃ ca garutmatā
viṣeṇāmṛtayuktena girau marakatāhvaye
tadvāntaṃ hi khanībhūtaṃ saṃjātaṃ tutthakaṃ khalu
mayūrakaṇṭhasacchāyaṃ bhārāḍhyamiti śasyate
kharparī
mṛtpāṣāṇaguḍaistulyastrividho rasiko mataḥ
pītastu mṛttikākāro mṛttikārasiko varaḥ
guḍāmo madhyamo jñeyaḥ pāṣāṇabhaḥ kaniṣṭhakaḥ
rājāvarto'lparakto'nīlimāśritasuprabhaḥ
guruśca masṛṇaḥ śreṣṭhastadanyo madhyamaḥ smṛtaḥ
kṣīrāndhimathane caitadamṛtena sahotthitam
nijagandhena tān sarvān harṣayan suradānavān
tattu devagaṇairguptaṃ gandhakākhyāṃ samāśrayat
rasasya bandhanārthāya jāraṇāya ca jāyate
ye guṇāḥ pārade proktāste caivātra bhavanti hi
caturdhā gandhako jñeyo varṇaiśśvetādibhiḥ svayam
śveto'tra sphaṭikābhaḥ syācchasto'sau lohamāraṇe