Shivattvaratnakara 76.95

76.95

tathāmalakasārākhyo yo bhavet pītavarṇavān
śukapicchassa eva syācchreṣṭho'sau tu rasāyane
raktastu śukatuṇḍākhyo dhātuvādavidhau paraḥ
durlabhaḥ kṛṣṇavarṇaśca jvaramṛtyuvināśanaḥ
himavatpādaśikhare kaṃkuṣṭhamupajāyate
tatraikaṃ nālikākhyaṃ hi tadanyadreṇukaṃ matam
pītaprabhaṃ guru snigdhaṃ śreṣṭhaṃ kaṃkuṣṭhamādimam
śyāmapītalaghulyaktasatvaṃ necchanti reṇukam
manaśśilā tridhā proktā śyāmalā karavīrakā
kandākhyā ceti nirdiṣṭā śreṣṭhā tāsūttarottarā
śyāmā raktā ca gaurā ca bhārāḍhyā śyāmikā matā
tejasvinī ca nirgāḍhā svarṇābhā karavīrakā
cūrṇībhūtātiraktāṅgī tṛtīyā rasasaṃyutā
yathottaraṃ guṇaiśśreṣṭhā bhūrisatvā prakīrttitā
saurāṣṭrakhanisaṃbhūtā mṛtsā yā tu varā matā
vastre tu lipyate yā tu mājiṣṭhāṅgāravardhinī
pīḍitā sphuṭikā ceti dvidhā sā parikīrttitā
īṣatpītā guru snigdhā pītikā viṣanāśinī
nirbharā śubhravarṇā ca snigdhā sāmlā parā matā
varāṭikā dvidhā proktā budhaisstrīpuṃvibhedataḥ
pītābhā granthilā kṣudrā dīrghā vṛttā varāṭikā
rasavadyairvinirdiṣṭā sā carācarasaṃjñikā
sārdhaniṣkvarā śreṣṭhā niṣkabhārā ca madhyamā
pādonaniṣkabhārā tu kaniṣṭhā parikīrttitā
dvividhaṃ gairikaṃ proktaṃ pāṣāṇasvarṇabhedataḥ
tatrādyaṃ tāmravarṇāḍhyaṃ kaṭhinaṃ parikīrttitam
atyantaśoṇitaṃ snigdhaṃ masṛṇaṃ svarṇagairikam
tālakaṃ dvividhaṃ proktaṃ patrapiṇḍaprabhedataḥ
tatrādyo bahupatrāḍhyo bhāsurastaruṇātkaḥ
svarṇavarṇo guruḥ snigdhaśśasyate ca rasāyane
niṣpatraṃ piṇḍasadṛśaṃ svalpasatvaṃ tathā guru
strīpuṣpaharaṇe dakṣo dvitīyaḥ parikīrttitaḥ
gireradhityakāyāṃ tu pāṣāṇaṃ tat sthitaṃ rajaḥ
śubhraśoṇaprabhaḥ prokto girisindūrasaṃjñikaḥ