Shivattvaratnakara 77.65

77.65

datvā datvātha dhānyāmlamevaṃ kṛtvā dinatrayam
samyak soṣṇāranālena rasaṃ prakṣālayetpriye !
paṭṭarājitrikaṭukaṃ mūlakaṃ citrakaṃ varām
punarnavāṃ meṣaśṛṅgīṃ meghanādaṃ mahābalam
ārdrakaṃ rajanīṃ nāgavallīṃ janavasārakam
samaṃ dhānyāmlakaiḥ piṣṭvā ślakṣṇavastraṃ pralepayet
yāvadaṃgulamātraṃ ca tasmin pañcādrasaṃ kṣipet
tadvadhvā tāmraje pātre kṣiptvā dhānyamlapūrite
kaṭicolākhyayantre ca svedayettamaharniśam
samuddhṛtya punaścoṣṇe sāranāḷe śarāvake
prakṣālayet sūtarājamevaṃ kṛtvā trisaptadhā
prasvedayet sūtarājaṃ tatassaṃmardayet priye !
athāto mardanaṃ karma vakṣyāmi śṛṇu pārvati !
cūrṇādi pūrṇadravyaṃ ca viśālaṃ rājavṛkṣakam
aṅkolaṃ kṛṣṇadattūraṃ trikaṭuṃ ca samaṃ samam
sarvaṃ sūtakalāṃśena sapta khalve rasaṃ kṣipet
ajāśakṛtpāgniṃ ca khātvā bhūmau vinikṣipet
tasyopari sthitaṃ khalvaṃ taptakhalvamudāhṛtam
mardayetpūrvadhānyāmlairdivā rātraṃ punaśca tam
kṣālayenmṛṇmaye pātre tataścoṣṇāranālakaiḥ
mardanaṃ kṣālanaṃ caivamekaviṃśativārakam
evaṃ vimarditaṃ sūtaṃ samādhāyātha mūrchayet
atha mūrchāṃ pravakṣyāmi śṛṇutvaṃ sāvadhānataḥ
rājikāmeṣaśṛṅgī ca citradaṃ ca phalatrayam
kṣīrakandaṃ sūraṇaṃ ca sarpākṣīṃ kākamācikām
nīlī valā vacā kanyā kṛṣṇonmattastadākṛvi
śvetāparājitāṅkologojihvā garuḍī tathā
eteṣāṃ svarasairmardyo ravikṣīreṇa pāradaḥ
vyastānāṃ vā samastānāṃ rasaireṣāṃ dināvadhi
mardayettaptakhalve tu mūṣāyāṃ tu rasaṃ kṣipet
nirudhya bhūdhare yantre vipaścittaṃ punaḥ priye !
rājakādyauṣadhabhavairdravaistrissapta1) vārakam
mardanaṃ bhūdhara pākaṃ śrutvā saṃmūrchayedrasam
evaṃ saṃmūrchitaṃ sūtaṃ kṣālayetkāñjikena tu