Shivattvaratnakara 77.82

77.82

soṣṇena vāriṇā vāpi sūtamutthāpayet priye !
pātanāyantrayogena rasasyotthāpanaṃ bhavet
rasasya pātanaṃ vakṣye pārabrahme ca cittakam
śārṅgilī kākamācī ca maṇḍūkī nirvikarṇikā
kumārī ca jayā bhṛṅgī gojihvā śaṃkhapuṣpikā
ārdrakaṃ devadālī ca tilaparṇī ca nīlikā
āragvadhaḥ kṣīrakandamaṅkolaṃ devadāru ca
etairasaissamastānāṃ vyastānāṃ vā dinaṃ rasam
mardayettaptakhalve tu śulvaṃ sūtacaturthakam
tatpiṣṭaṃ pātayedyantramūrdhvapātanake dinam
ūrdhvalagnaṃ rasaṃ śuddhaṃ tamādāyātha mardayet
pūrvoditoṣadharasaiḥ pūrvavacchulvasaṃyutam
pātayenmardayedevaṃ saptavāraṃ punaḥ punaḥ
ūrdhvapātanasaṃśuddhaṃ pāradaṃ pātayedadhaḥ
athādhaḥ pātanaṃ vakṣye tryūṣaṇaṃ lavaṇaṃ parām
citrakaṃ rājikaṃ śigruṃ sarve sūtasamaṃ kṣipet
mardayettaptakhalve tu rasaṃ dhānyāmlakena ca
tatkalkena lipedūrdhvabhāṇḍaṃ samyaṅ nirodhayet
ūrdhvabhāṇḍasya pṛṣṭhe tu dadyāllaghupuṭaṃ tataḥ
ityadhaḥ pātanaṃ kuryāt saptavāraṃ punaḥ punaḥ
adhaḥ pātanaśuddhasya tiryak pātanāmācaret
vakṣyāmi tiryak patanaṃ sūtaṃ dhānyābhrakaṃ samam
dhānyāmlairmardayedyāmaṃ tiryakpātanayantrake
bhāṇḍāgninā pacedevaṃ saptavāraṃ punaḥ punaḥ
evaṃ tridhā prapītaṃ ca punassūtaṃ nirodhayet
abhrakaṃ vātha gandhaṃ vā mākṣikaṃ vimalaṃ tathā
svarṇaṃ vā rajataṃ vāpi kāntaṃ vā tīkṣṇameva vā
pratyekaṃ śuddhikṛddeyaṃ tāmrapakvādamātrakam
pādādraikarasaiḥ kuryānmardanaṃ pātanaṃ kramāt
yadyaddravyānvitasstūtastattad dravyaguṇapradaḥ
pātanāttāmrayogācca nāgavaṅgau tyajedrasaḥ
athavā dīpikā yantre śuddhassyāt pātito rasaḥ
kadādīrodhane sūtaḥ svedādyaiḥ pañcakarmabhiḥ
āpyāyanākhyaṃ sūtasya karmakuryānnirodhanam