Shivattvaratnakara 8.39

8.39

lākṣāpralepamāṃsādānirucchvasanasocchvasāḥ
yugmādriśālmalīloha pradīptakṣutpipāsikāḥ
kṛmīṇāṃ nicayaścaiva rājānaḥ parikīrtitāḥ
lohastambho'tha viṇmūtre tathā vaitaraṇī nadī
tāmisraścāndhatāmisraḥ kumbhīpākaścarauravaḥ
mahāpadānugāmī ca rājarājeśvarāhvayaḥ
trayastriṃśatpuṭe 1) ṣvardhaṃ pārthivaṃcārdhamāyasam
tanmadhye narakā ghorā bahuśastamasi sthitāḥ
teṣāṃ narakabhedānāmaṣṭāviṃśatikoṭayaḥ
eteṣāṃ dāruṇānāntu narakāṇāṃ patiḥ sthitaḥ
kūṣmāṇḍa iti vikhyātaḥ praḷayārkānaladyutiḥ
karālavadanaḥkruddho vṛttakoṭaralocanaḥ
ṭaṃkapāṇistathābhūtairbhūtairbhūyobhirādṛtaḥ
pāpāstveteṣu pacyante narāḥ karmānurūpataḥ
yātanābhirvicitrābhirāpāpaprakṣayāntakam
prāyaścittojjhitā dṛptā nijadharmaparāṅmukhāḥ
paradharmaratāścorāḥ patanti narakāgniṣu
mahāpātakinaḥ kalpaṃ tiṣṭhanti narakāgniṣu
manvantaraṃ pātakino devabrahmasvahāriṇaḥ
upapātakino martyā devadevāgni yajvanām
dvijagogurudharmāṇāṃ nindakā brahmaṇo dinam
anye caturyugaṃ martyāstadardhaṃ ca narādhamāḥ
tiṣṭhanti narake ghore nijapāpānugūpyataḥ
dyūtastrīviṣayāsaktā ye dharma 2) vikalāḥ khalāḥ
patanti teṣu ghoreṣu narakeṣu narādhamāḥ
na śṛṇvanti ca ye mūḍhāḥ sādhūktaṃ dharmagauravam
pratyakṣaṃ kena taddṛṣṭaṃ pratyuteti vadanti ca
kāmalobhābhibhūtāśca biḍālavratinastathā
pāpiṣṭhāḥ karmahīnāśca jihvopasthaparāyaṇāḥ
yatinindāparā ye ca kṣetratīrthādidūṣakāḥ
patanti teṣu te martyāḥ vivaśāḥ pāpabandhanāḥ
ihānubhūya nirdiṣṭamāyurmartyāssvayambhuvā