Shivattvaratnakara 83.110

83.110

anyadhikkaraṇādātmotkarṣo garyo 1) baloditaḥ
viṣādaścetaso bhaṅgaupāyābhāvacintanaiḥ
kālākṣamatvamautsukyaṃ manastāpatvarādikṛt
indriyavyāptirāhityaṃ nidrā cittanimīlanam
āvego mohaduḥkhādyairapasmāro'jñatāprakṛt
suptirnidrāsamudreko manovṛttivivarjitaḥ
vibodhaścetanāvyāptijṛmbhākṣepavimārgakṛt
amarṣassāparādhepu cetaḥ prajvalanaṃ matam
harṣādyākārasaṃguptiravahittheti kathyate
dṛṣṭe'parādhe caṇḍatvamugratā tarjanādikṛt
tattvamārgādisaṃdhānādarthanirdhāraṇaṃ matam
manastāpādyabhibhavo jvarādivyādhiriṣyate
unmādassamavṛttitvaṃ 2) cetanācetaneṣvapi
maraṇaṃ maraṇārthastu prayatnaḥ parikīrttitaḥ
ākasmikabhayāccittakṣobhastrāsaḥ prakīrttitaḥ
sandehātkalpanānantyaṃ vitarkaḥ parikīrttitaḥ
vibhāvādyāḥ pṛthagbhāvāḥ kīrtyante'tha rasāśrayāḥ
ālambanastu śṛṅgāraṃ nāyikānāyakādayaḥ
uddīpanāstu kathitāścandrikopavanādayaḥ
anubhāvāḥ prakīrtyante kaṭākṣakṣepaṇādayaḥ
stambhādayassāttvikāḥ syurdarśanasparśanādayaḥ
nirvedādyā yathāyogaṃ yogyāssaṃcāriṇo'pi ca
saṃbhogo vipralambhaśca śṛṅgāro dvividho mataḥ
saṃbhogassaṃnikarṣe syādbhāṣaṇāyaiḥ parasparam
vipralambho'bhilāṣerṣyāpravāsādyairanekadhā
raterullāsasaṃbhūtā vidyante'tra daśā daśa
cakṣuḥprītirmanassaṅgassaṅkalpo jāgarastathā
tanutā viṣayadveṣastrapānāśastataḥ param
moho mūrcchā mṛtiriti vijñeyāstā yathākramam
ādarādvīkṣaṇaṃ yattu cakṣuḥprītirudāhṛtā
cittāsaktirmanassaṅgaḥ pratikṛtyādibhissmṛtaḥ
manorathaiḥ priyāvāptissaṅkalpassamudīritaḥ
priyānavāpticintābhirasvāpo jāgro mataḥ
kṛśatā tu tanoḥ kāmajvareṇa tanutā matā