Shivattvaratnakara 87.23

87.23

narmadyutiḥ pragamanaṃ virodhaḥ paryupāsanam
vajraṃ puṣpamupanyāso varṇasaṃhāra ityapi
ratyarthehā vilāsaḥ syād dṛṣṭanaṣṭānusarpaṇam
parisarpo vidhūtaṃ syādaratistacchamaśśamaḥ
parihāsavaco narmadyutistajjāḍyanirmitā
yathottaraṃ vākpragamo hitarodho nirodhanam
prasādhanamupanyāso vajraṃ niṣṭhurabhāṣaṇam
puṣpaṃ vākyaviśeṣaḥ syādanurāgaprakāśakam
cāturvarṇyopagamanaṃ varṇasaṃhāra iṣyate
evaṃ trayodaśāṅgāni sandheḥ pratimukhasya tu
garbhastu dṛṣṭanaṣṭasya bījasyānveṣaṇaṃ muhuḥ
alpāptyāśāpatākānuguṇyenāṅgopakalpanam
abhūtāharaṇaṃ mārgo rūpodāharaṇe kramaḥ
saṅgrahaścānumānaṃ ca toṭakādhipade tathā
udvegasaṃbhramākṣepā dvādaśāṅgānyanukramāt
abhūtāharaṇaṃ chadma mārgastatvārthadarśanam
rūpaṃ vitarkavadvākyaṃ sotkarṣaṃ syādudāhṛtiḥ
kramassaṃcintyamānāptirbhāvajñānamathāpare
saṅgrahassāmadānokti ranumānamathohnam
adhisandhistvadhivalaṃ saṃrabdhaṃ toṭakaṃ vacaḥ
udvego riktatā bhītiśśaṅkātrāsau ca saṃbhramaḥ
garbhabījasamutkṣepādākṣepaḥ parikīrttitaḥ
garbhākhyasandheraṅgāni dvādaśaitāni cakṣate
garbhasandhau prasiddhasya bījasyārthavimarśanam
hetunā yena kenāpi vimarśassandhirīṣyate
niyatāptiprakaryukteraṅgānyasya trayodaśa
tatrāpavādassaṃpheṭo vidravadravaśaktayaḥ
dyutiḥ prasaṅgaśchalanaṃ vyavasāyo virodhanam
prarocanā vicalanamādānaṃ ca trayodaśa
doṣaprakhyāpavādassyāt saṃpheṭo roṣabhāṣaṇam
vidravo vadhabandhādirdravo 1) gurutarasmṛtiḥ
virodhaśamanaṃ śaktistarjanodvejane dyutiḥ
gurukīrttiḥ prasaṅgasyācchalanaṃ cāvamānanam
vyavasāyassvaśaktyuktissaṃrabdhoktirvirodhanam