Shivattvaratnakara 87.40

87.40

siddhāmantraṇatā bhāvidarśikā syātprarocanā
guṇoktiḥsyādvicalanmādānaṃ kāryasaṅgrahaḥ
avamarśākhyasandhau syuraṅgānyevaṃ trayodaśa
bījavanto mukhādyarthā viprakīrṇā yathāyatham
aikārthyamupanīyante yatra nirvahaṇaṃ hi tat
phalāptikāryānuguṇyādaṅgānyasya caturdaśa
sandhirvirodho grathanaṃ nirṇayaḥ paribhāṣaṇam
prasādānandasamayāḥ kṛtirbhāṣopagūhanam
pūrvabhāvopasaṃhārau praśastiśca caturdaśa
sandhirbījopagamanaṃ virodhaḥ kāryamārgaṇam
grathanaṃ tadupakṣepo'nubhūtākhyātānirṇayaḥ
paribhāṣā mitho jalpaḥ prasādaḥ paryupāsanam
ānando vāñchitāvāptissamayo duḥkhanirgamaḥ
kṛtirlabdhārthagamanaṃ mānādvyāptistu bhāṣaṇam
kāryaṃ dṛṣṭamadbhutaprāptipūrvaṃ bhāvastu gūhane
phalāptirupasaṃhāraḥ praśastiśśubhaśaṃsanam
evaṃ caturdaśāṅgāni bhaveyurupasaṃhṛteḥ
1) uktānyaṅgacatuṣṣaṣṭiṣṣoḍhā caiṣāṃ prayojanam
iṣṭasyārthasya racanā gopyaguptiḥ prakāśanam
rāgaprayogaścāścaryaṃ vṛttāntasya ca vistaraḥ
tredhā vibhāgaḥ karttavyassarvasyāpīha vastunaḥ
sūcyameva bhavet kiñcid dṛśyaṃ śrāvyaṃ tathāparam
dṛśyaṃ tu madhurodāttarasabhāvānirantaram
arthopakṣepakaissūcyaṃ pañcabhiḥ pratipādayet
viṣkambhacūlikāṅkāsyapraveśāṅkāvatāraṇaiḥ
vṛttavartiṣyamāṇānāṃ kathāṃśānāṃ pradarśakaḥ
saṅkṣepārthastu viṣkambho madhyapātraprayojitaḥ
sa dvidhā kovidaiḥ proktaśśuddhamiśravibhedataḥ
saṃskṛtaprāyikaśśuddho bhāṣāmiśrastu miśrakaḥ
tadvadevāmudāttoktyā nīcapātraprayojitaḥ
praveśo'ṅkadvayasyāntaśśeṣārthasyopa2) pūrakaḥ
antaryavanikāsaṃsthaiścūlikārthasya sūcanā
aṅkāntapātrairaṅkāsyamuttarāṅkārthasūcanā