Shivattvaratnakara 88.29

88.29

haste caiva sureśvare ca mṛgabhe tārāsu śastāsu ca
kuryānniṣkramaṇaṃ śiśorbudhagurau śukreṣvarikte tithau
kanyākumbhatulāmṛgāribhavane saumyagrahālokite
agrato'tha pratinyasya śilpabhāṇḍāni sarvaśaḥ
śastrāṇi caiva vastrāṇi tataḥ paśyettu lakṣaṇam
prathamaṃ yatspṛśedvālastato bhāṇḍaṃ svayaṃ tathā
jīvikā tasya bālasya tenaiva tu bhaviṣyati
pañcame ca tato māsi taṃ bhūmāvupaveśayet
tatra sarve grahāśśastā bhaumo'pyatra viśeṣataḥ
uttarātritayaṃ saumyaṃ puṣyarkṣaṃ śakradaivatam
prājāpatyaṃ ca hastaśca śastamāśvinamitrabham
varāhaṃ pūjayeddevaṃ pṛthivīṃ ca viśeṣataḥ
rakṣainaṃ vasudhe ! devi ! sadā sarvagataṃ śubhe !
āyuḥpramāṇaṃ sakalaṃ nikṣiptasva haripriye !
acirādāyuṣastvasya ye kecitparipanthinaḥ
jīvikārogyavitteṣu nirdahasvācireṇa tān
kumāraṃ pāhi mātastvaṃ brahmā tadanumanyatām
iti saṃprāthyaṃ bhūmau tu śiśuṃ tatropaveśayet
ṣaṣṭhe māse tathā kuryādannaprāśanamuttamam
revatī rohiṇī hastā puṣyaśravaṇayugmake
uttarātritaye vāpi vāre candre bṛhaspatau
budhabhārgavayoścaiva śaste lagne śubhe tithau
devatāpuratastasya dhātryutsaṅgagatasya ca
alaṃkṛtasya dātavyamannaṃ pātre sakāñcanam
madhvājyadadhisaṃyuktaṃ pāyasaṃ prāśayettataḥ
bālakānāṃ svakīyānāmavyaktaṃ śṛṇuyādvacaḥ
ardhārdhaṃ bhāṣitaṃ teṣāṃ gālidānaṃ manoharam
jānusaṃkramaṇaṃ paśyet skhalitaṃ ca padakramam
mātṛhastāvalambena lalitaṃ gamanaṃ śanaiḥ
phalapradarśanādvālamāśritaṃ māturuṅkataḥ
aṅkamāropayedenamuraskandhatalaṃ yathā
rakṣāmantrāṅkitaiḥ patrairlākṣāktaiḥ pariveṣṭitam
śārdūlanakhasaṃyuktaṃ pravālāṃkuraśobhitam
kaṃcardekena citreṇa ratnāṅkena virājitam
ajaromavimiśraṃ ca bibhrāṇaṃ kaṇṭhasūtrakam