Shivattvaratnakara 88.46

88.46

pañcalohaviklṛptaiśca valayairbhūṣitāṅgakam
padayoḥ kaṭideśe ca hemaghargharikāyutam
sauvarṇakuṇḍalaprotakarṇapālīvirājitam
aśvatthapatrasaṅkāśamūrdhabhūṣāṅkitālikam
mātaraṃ pitaraṃ dṛṣṭvā dhāvamānamitastataḥ
kumāraṃ sukumārāṅgamāliṅgedavanīpatiḥ
karṇau kacāṃśca karṣantaṃ varṣantaṃ harṣamātmani
cumbaṃstaṃ vadanaṃ bhūpaḥ pariṣvajya sukhībhavet
yogīndramiva sānandaṃ digvastramaparigraham
jaṭilaṃ bhūri bhūpāḍhayaṃ gaṅgādharamivātmajam
putraṃ gātrātsamutpannamīkṣante puṇyabhāginaḥ
vatsarādvitayādūrdhvaṃ cūḍākarma yathākramam
hastāśviviṣṇupauṣṇāśca śraviṣṭhādityapuṣyabham
saumyacitre navarkṣāre uttamā nava tārakāḥ
raveraṅgārakasyaiva sūryaputrasya caiva vā
ninditā divasāḥ kṣaure śeṣā vārāśśubhāvahāḥ
ṣaṣṭhyaṣṭamī caturthī ca navamī ca caturdaśī
dvādaśī darśapūrṇe dve pratipaccātra ninditāḥ
akṣaragrahaṇaṃ kāryaṃ prāpte pañcamahāmane
gurussomaśca saumyaśca śreṣṭho'niṣṭau kujassitaḥ
vidyārambhe budhaiḥ proktau madhyamau budhabhāskarau
pūrvātrayaṃ śrutidvandvaṃ vidyādau mūlamaśvinī
hastā śatabhiṣak svātī citrā ca mṛgapañcakam
akruddhaśśāstramarmajño'nālasyo vyasanojjhitaḥ
hastasiddhastathā vāgmī kalācāryo matassatām
pitṛsyāmāhatasyaiva kalācāryasya bālakaḥ
vatsarāt pañcamādūrdhvamarpaṇīyaḥ kṛtotsavaḥ
iṣṭānāmanyaniṣṭānāṃ varaṃ bhavatu mūrkhatā
nāstikā duṣṭaceṣṭāśca vidyā vidyāgurornatu
vidyayāpi tayā kiṃvā yā nāstikyādidūṣitā
svarṇenāpi hi kiṃ tena karṇacchedaṃ karoti yat
ācāryo madhurairvākyaissābhiprāyāvalokanaiḥ
śiṣyaṃ śiṣyānna nirlajjaṃ kuryādvandhanatāḍanaiḥ
mastake hṛdaye vāpiprājñaśchātraṃ na tāḍayet