Shivattvaratnakara 9.24

9.24

sutaptalohaśayanamekapādaprataptakam
asitālavanaṃ ghoramasthibhaṃgaprapīḍanam
1)tilātasīkṣuyantrāṇi kūṭapāśapramardanam
mahācullī suṃcullī ca taptalohamayī śilā
parvatakṣuradhārākhyaṃ tathā ca malaparvataḥ
mūtraviṣṭhāndhakūpeṣu kṣārakṛpeṣu pātanam
musalolūkhalaṃ yantraṃ śilāśakalalāṃgalam
tālāpatrāsigahanaṃ mahāmaśakaṃmaṇḍapam
sammohano'sthibhaṃgaśca taptaśūlamayo guḍaḥ
bahuduḥkhaṃ mahāduḥkhaṃ kaśmalaṃ śamalaṃ malam
hālāhalo virūpaśca surūpaśca tamonugaḥ
ekapādāstripādaśca tīvravīciścarantimaḥ
aṣṭāviṃśatirevaite kramaśaḥ paṃcakāḥsmṛtāḥ
koṭināmānupūrvyeṇa paṃcapaṃcaivanāyakāḥ
rauravādyaṃ ca vīryaṃ ca śatamekantu sarvataḥ
catvāriṃśatsamadhikaṃ mahānarakamaṇḍalam
teṣu pāpāḥ prapacyante narāḥ karmānurūpataḥ
yātanābhirvicitrābhirākarma prakṣayād bhṛśam
sugūḍhaṃ hastayorbaddhvā taptaśṛṅkhalayā narāḥ !
mahāvṛkṣapraśākhāsu 2)gamyante yamakiṃkaraiḥ
ḍolitāścāti vegena nissaṃjñā yānti yojanam
antarikṣasthitānāṃ ca lohabhāraśataṃ tataḥ
pādayorbadhyate teṣāṃ yamadūtairmahābalaiḥ
tena bhāreṇa mahatā bhṛśamātāḍitā narāḥ
khyāyantassvāni karmāṇi tūṣṇīṃ tiṣṭhanti vihvalāḥ
tatastaptairagnivarṇai rlauhadaṇḍai ssakaṇṭakaiḥ
hanyante kiṃkarairghorai ssamantātpāpakāriṇaḥ
tataḥkṣāreṇa dīptena vahnerapi viśeṣataḥ
samantataḥ pralipyante tāmreṇa ca punaḥ punaḥ
drutenātyantaliptena kṣatāṃgā jarjarīkṛtāḥ
punarvidhāya cāṃgāni śiraḥprabhṛti ca kramāt
vārtākavatprapacyante taptataile kaṭāhake