Shivattvaratnakara 90.116

90.116

bhruvau suvartule tanvyau snigdhe kṛṣṇe asaṃhate
praśaste mṛduromāṇau subhruvaḥ kāmukākṛtī
khararomā ca pṛthulā vikīrṇa saralā striyaḥ
na bhrūḥ praśastā militā dīrgharòmā ca piṅgalā
lambau karṇau śubhāvartau sukhadau ca śubhapradau
śaṣkulīrahitau nindyau sirālau kaṭilau kṛśau
phālassirāvirahito nilomārdhendusannibhaḥ
animnastryaṃgulo nāryāssaubhāgyārogyakāraṇam
vyaktasvastikarekhāṅkaṃ lalāṭaṃ rājyasampadi
pralambamalikaṃ yasyā devaraṃ hanti sā dṛḍham
romaśena śirālena prāṃśunā rogiṇī matā
sīmantassaralaśśasto mauliśśastarasamunnataḥ
gajakumbhanibho vṛttaḥ saubhāgyaiśvaryasūcakaḥ
sthūlamūrdhā ca vidhavā dīrghaśīrṣā tu bandhakī
viśālenāpi śirasā bhaved daurbhāgyabhājanam
keśā alikulacchāyāssūkṣmasnigdhāssukomalāḥ
kiñcidākuñcitāgrāśca kuṭilāścātiśobhanāḥ
paruṣāssphuṭitāgrāśca viralāśca śiroruhāḥ
piṅgalā laghavo rūkṣā duḥkhadāridryadāyakāḥ
bhruvorantarlalāṭe vā maśako rājyasūcakaḥ
vāme kapole maśakaśśoṇo mṛṣṭātradastriyāḥ
tilakaṃ lāñchanaṃ vāpi hṛdi saubhāgyakāraṇam
yasyā dakṣiṇavakṣoje tilakaṃ śoṇalāñchanam
kanyācatuṣṭayaṃ sūtvā sūte sā ca sutatrayam
tilakaṃ lāñchanaṃ śoṇaṃ yasyā vāme kuce bhavet
ekaṃ sutaṃ prasūyādau tatassā vidhavā bhavet
guhyasya dakṣiṇe bhāge tilakaṃ yadi yoṣitaḥ
tadā kṣitipateḥ patnī sūte vā kṣitipaṃ sutam
nāsāgre maśakaśśoṇo mahiṣyā eva tiṣṭhati
kṛṣṇassa eva bhartughnaḥ puṃścalyāśca prakīrtitaḥ
nābheradhasthaṃ tilakaṃ maśako lāñchanaṃ śubham
maśakastilakaṃ cihnaṃ gulphe dāridryadāyakam
kare karṇe kapole vā kaṇṭhe vāme sphuredyadi
eṣāṃ trayāṇāmekaṃ tu prāggarbhe putradaṃ bhavet