Shivattvaratnakara 90.99

90.99

gokṣīrasannibhāḥ snigdhā dvātriṃśaddaśanāśśubhāḥ
adhastādupariṣṭācca samāsstokaṃ samunnatāḥ
pītāḥ śyāmāśca daśanāssthūlā dīrghā vipaṃktayaḥ
śuktyākārāśca viralā duḥkhadaurbhāgyasūcakāḥ
adhastādadhikairdantairmātaraṃ bhakṣayet sphuṭam
patihīnā ca vikaṭaiḥ kulaṭā viralairbhavet
jihvā mṛṣṭabhoktrīsyācchoṇā mṛdvī tathā sitā
duḥkhāya madhyasaṅkīrṇā purobhāge savistarā
sitayā toyamaraṇaṃ śyāmayā kalahapriyā
daridrā syānmāṃsalayā lambayāmakṣyabhakṣiṇī
viśālayā rasanayā pramadātipramādabhāk
snigdhaṃ kokanadābhāsaṃ praśastaṃ tāluṃ komalam
site tāluni vaidhavyaṃ pīte pravrajitā bhavet
kṛṣṇe'patyaviyogārthā rūkṣe raudrakuṭumbinī
ghaṇṭī sthūlā suvṛttā ca nigūḍhāsthisulohitā
apralambā śubhā ghaṇṭī sthūlā kṛṣṇā ca duḥkhadā
alakṣitadvijaṃ kiñcit kiñcitphullakapolakam
smitaṃ praśastaṃ sudṛśāmanimīlitalocanam
samavṛttapuṭā nāsā laghucchidrā śubhāvahā
sthūlāgrā madhyanamrā ca na praśastā samunnatā
ākuñcitā ca bhugnā ca vaidhavyakleśadāyinī
parapreṣyā ca cipiṭā hrasvā dīrghā kalipriyā
dīrghāyuḥkṛt śrutaṃ dīrghaṃ yugapad dvitrisaṃyutam
lalanālocane śaste raktānte kṛṣṇatārake
gokṣīravarṇe piśite susnigdhe kṛṣṇapakṣmaṇī
unnatākṣī na dīrghāyussuvṛttā kulaṭā bhavet
meṣākṣī mahiṣākṣī ca kekarākṣī na śobhanā
kāmagṛhāḍhyā nitarāṃ gopiṅgākṣī sudurvratā
pārāvatākṣī duśśīlā raktākṣī bhartṛghātinī
koṭarāmagnanayanā gajanetrā na śobhanā
puṃścalī vāmakāṇākṣī vandhyā dakṣiṇakāṇikā
ramaṇī madhupiṅgākṣī dhanadhānyasamṛddhibhāk
pakṣmabhissughanaissnigdhaiḥ kṛṣṇaissūkṣmaissubhāgyabhāk
kapilairviralaissthūlairnindyā bhavati kāminī