Shivattvaratnakara 90.31

90.31

virāmā romakūpeṣu bhaved vaidhavyaduḥkha bhāk
vṛttaṃ piśitasamagraṃ jānuyugmaṃ praśasyate
nirmāṃsaṃ svairacāriṇyā daridrāyāstu viślatham
viśiraiḥ karabhākārairūrubhirmasṛṇairghanaiḥ
suvṛttaiḥ romarahitairbhavayurbhūpavallabhāḥ
vaidhavyaṃ romasaṃyuktairdīrbhāgyaṃ cipiṭairapi
madhyacchidrairmahāduḥkhaṃ rūkṣatvagbhirdaridratā
caturbhiraṅ‌gulaisśastā kaṭirviṃśatisaṃyutaiḥ
samunnatatitambāḍhyā caturaśrā mṛgīdṛśā
vinatā cipiṭā dīrghā nirmāṃsā saṅkaṭā kaṭiḥ
hrasvā romayutā nāryā duḥkhavaidhavyasūcikā
nitambabimbau nāriṇāmunnatau māṃsalau pṛthū
mahā bhogāya saṃproktau tadanyau duḥkhadau matau
kapitthaphalavad vṛttau pṛthulau māṃsalau ghanau
sphijau balivinirmuktau ratisaukhyavivardhanau
śubhaḥ kamaṭhapṛṣṭhābho gajaskandhopamo bhagaḥ
vāmonnatastu kanyāsūḥ putrasūdakṣiṇonnataḥ
ākhuromā gūḍhamaṇiḥ suśliṣṭassaṃhataḥ pṛthuḥ
tuṅgaḥ kamalavarṇābhaḥ śubho'śvatthadalākṛtiḥ
kuraṅgakhurarūpo'tha cullīkoṭarasannibhaḥ
romaśo vivṛtāsyaśca dravyanāśotidurbhaṃgaḥ
śaṅkhāvarto bhage yasyāssā garbhamiha necchati
cipiṭā kharparākāraḥ kiṅkarīpadado bhagaḥ
vaṃśavetasapatrābho rājiromoccanāsikā
vikaṭaḥ kuṭilākāro lambagallaśślatho'śubhaḥ
bhagasya phālaṃ jaghanaṃ vistīrṇaṃ tuṅgamāṃsalam
pṛthulaṃ mṛduromāḍhyaṃ dakṣiṇāvartamīḍitam
vāmāvartaṃ ca nirmāṃsaṃ bhugnaṃ vaidhavyasūcakam
saṅkaṭaṃ sthapuṭaṃ rūkṣaṃ jaghanaṃ duḥkhadaṃ sadā
bastiḥ praśastā vipulā mṛdvī stokasamunnatā
romaśā ca śirālā ca rekhāṅkā saiva śobhanā
gambhīrā dakṣiṇāvartā nābhiḥ syāt sukhasampade
vāmāvartā samuttānā vyaktagrandhirna śobhanā
sūte sutān bahūnārī pṛthukukṣissukhāspadam