Shivattvaratnakara 90.48

90.48

kṣitīśaṃ janayetputraṃ maṇḍūkābhena kukṣiṇā
unnatena valībhājā sāvartenāpi kukṣiṇā
vandhyā pravrajitā dāsī kramādyoṣā bhavediha
samaissamāṃśairmṛdubhiryodhinmagnāsthibhiśśubhaiḥ
pārśvaissaubhāgyasukhayornidhānaṃ syānnasaṃśayaḥ
yasyā dṛśye sire pārśve unnate romasaṃyute
anapatyā ca duśśīlā sā bhaved duḥkhaśevadhiḥ
udareṇātinucchena viśireṇa mṛdutvacā
yoṣidbhavati bhogāḍhyā nityaṃ mṛṣṭānnasevinī
kumbhākāraṃ daridrāyā jaṭharaṃ ca mṛdaṅgavat
kūṣmāṇḍābhaṃ yavāsaṃ vā duṣputro jāyate striyāḥ
suviśālodarā nārī nirapatyā ca durbhagā
pralambajaṭharā hanti śvaśuraṃ cāpi devaram
madhyakṣāmā ca subhagā bhogāḍhyā suvalitrayā
ṛjvī tanvī ca romālī yasyāssā narmaśarmabhūḥ
kapilā kuṭilā sthūlā prodbhinnā romarājikā
vairaṃ vaidhavyadaurbhāgye vidadhyādiha yoṣitām
nirloma hṛdayaṃ yasyāssamaṃ nimnatvavarjitam
aiśvaryaṃ cāpyavaidhavyaṃ priyā patyuśca sā bhavet
vistīrṇahṛdayā yoṣā puṃścalī nirdayā tathā
udbhinnaromahṛdayā patiṃ hanti viniścitam
aṣṭādaśāṃgulatatamuraḥ pīvaramunnatam
sukhāya duḥkhāya bhavedromaśaṃ viṣamaṃ pṛthu
ghanau vṛttau dṛḍhau pīnau samau śastau payodharau
sthūlāgrau viralau śuṣkau vāmorūṇāṃ na śarmadau
dakṣiṇonnatavakṣojā putriṇīṣvagraṇīrmatā
vāmonnatakucā sūte kanyāṃ saubhāgyasundarīm
ābaddhadvipuṭītulyau kucau dauśśīlyasūcakau
pīvarāsyau sāntarālau pṛthūpāntau na śobhanau !
mūle sthūlau kramakaśāvagre tīkṣṇau payodharau
sukhadau pūrvakāle tu paścādatyantaduḥkhadau
sudṛśāṃ cūcukayugaṃ śastaṃ śyāmaṃ suvartulam
antarmagnaṃ ca dīrghaṃ ca kṛśaṃ kleśāya jāyate
pīvarābhyāṃ ca jatrubhyāṃ dhanadhānyanidhirvadhūḥ