Shivattvaratnakara 97.229

97.229

grāhakairgṛhyate coro loptreṇāthapadena vā
pūrvakarmāparādhī ca tathā cāśuddhavāsakaḥ
anye ca śaṅkayā grāhyā jātināmādinihnavaḥ
dyūtastrīpānasaktāśca śuṣkaminnamukhasvarāḥ
paradravyagṛhāṇāṃ ca pṛcchakā gūḍhacāriṇaḥ
nirāyavyayantaśca vinaṣṭadravyavikrayāḥ
gṛhītaśśaṅkayā caurye nātmānaṃ cedviśodhayet
dāpayitvā hṛtaṃ dravyaṃ coradaṇḍena daṇḍayet
coraṃ pradāpyāpahṛtaṃ ghātayedvividhairvadhaiḥ
sacihnaṃ brāhmaṇaṃ kṛtvā svarāṣṭrādvipravāsayet
1) ghātite'pahṛto doṣo grāmabharturanirgate
nivītamartustu pathi cāroddharturavītake
svasīmni dadyād grāmyastu yatra gacchati
pañcagrāmī bahiḥ krośād daśagrāmyathavā punaḥ
bandigrahāṃstathā vājikuñjarāṇāṃ ca hāriṇaḥ
prasahya ghātinaścaiva śūlamāropayennarān
utkṣepagranthibhedau karasaṃdaṃśahīnakau
kāryo dvitīyāparādhe karapādaikahīnakau
kṣudramadhyamahādravyaharaṇe sārato damaḥ
deśaṃ kālaṃ vayaśśaktiḥ sañcintyaṃ daṇḍakarmaṇi
suvarṇarajatādīnāmuttamānāṃ ca vāsasām
ratnānāṃ caiva sarveṣāṃ śatādapyadhike vadhaḥ
pañcāśatastvabhyadhike hastacchedanamiṣyate
puruṣāṇāṃ kulīnānāṃ nārīṇāṃ ca viśeṣataḥ
ratnānāṃ caiva sarveṣāṃ haraṇe vadhamarhati
sandhiṃ bhitvā tu ye cauryaṃ rātrau kurvanti taskarāḥ
teṣāṃ chitvā nṛpo hastau tīkṣṇaśūle niveśayet
bhaktāvakāśāgnyudakamantropakaraṇavyayān
datvā corasya hanturvā jānato dama uttamaḥ
śastrāvapāte garbhasya pātane cottamo damaḥ
vipraduṣṭāṃ striyaṃ caiva puruṣaghnīmagarbhiṇīm
setubhedakarīṃ cāpsu śilāṃ baddhvā praveśayet
viṣāgnidāṃ patigurunijāpatyapramāpaṇīm
vikarṇakaranasoṣṭhīṃ kṛtvā gobhiḥ pramāpayet