Shivattvaratnakara 97.246

97.246

kṣetraveśmavanagrāmavivītakhaladāhakāḥ
rājapatnyabhigāmī ca dagdhavyāstu kaṭāgninā
pumān saṃgraharaṇe grāhyaḥ keśākeśiparastriyāḥ
sadyo vā kāmajaiścihnaiḥ pratipattau dvayostathā
nīvīstanaprāvaraṇasakthikeśāvamarśanam
ādeśaḥ kālasaṃbhāṣaṃ sahaikasthānamevaca
strī niṣedhe śataṃ dadyāt dviśataṃ tu damaṃ pumān
pratiṣedhe tayordaṇḍo yathā saṃgraharaṇe tathā
sajātā uttamā daṇḍā anulome tu madhyamāḥ
prātilomye vadhaḥ puṃsāṃ nāryāḥ karṇādikartanam
alaṃkṛtāṃ haran kanyāmuttamaṃ tvanyathā damam
daṇḍaṃ dadyāt savarṇāsu pratilome vadhaḥ smṛtaḥ
dūṣaṇe tu karaccheda uttamāyā vadhastathā
paśūn gacchan śataṃ dāpyo hīnāṃ strīṃ gāṃ ca madhyamaḥ
avaruddhāsu dāsīṣu bhujiṣyāsu tathaiva ca
gamyāsvapi pumān dāpyaḥ pañcāśatapaṇakaṃ damam
antyābhigamane tvaṅkyaḥ kubandhena pravāsayet
śūdrastathāntya eva syādantyasyāryāgame vadhaḥ
rājño'niṣṭapravaktāraṃ tasyaivākrośakārakam
tanmantrasya ca bhettāraṃ chitvā jihvāṃ pravāsayet
ūnaṃ vāpyadhikaṃ vāpi likhito rājaśāsanam
pāradārikacoraṃ vā muñcato daṇḍa uttamaḥ
abhakṣyeṇa dvijaṃ dūṣya daṇḍya uttamasāhasaḥ
madhyamaṃ kṣatriyaṃ vaiśyaṃ prathamaṃ śūdramardhikam
kūṭasvarṇavyavahārī vimāṃsasya ca vikrayī
aṅgahīnastu kartavyo dāpyaścottamasāhasaḥ
catuṣpāde kṛto doṣo nāpaitīha prajalpataḥ
kāṣṭhaloṣṭeṣupāṣāṇabāhuyugmakṛtastathā
chinnanasyena yānena tathā bhagnayugādinā
paścāccaivāpasaratā hiṃsane svāmyadoṣabhāk
śakto'pyamokṣayan svāmī daṃṣṭriṇāṃ śṛṅgiṇāṃ tathā
prathamaṃ sāhasaṃ dadyādvikṛṣṭe dviguṇaṃ tathā
jāraṃ cauratyabhivadan dāpyaḥ pañcaśataṃ damam
upajīvya dhanaṃ muñcan tadevāṣṭaguṇīkṛtam