Shivattvaratnakara 97.93

97.93

agnidānāṃ ca ye lokā ye ca strībālaghātinām
sa tān sarvānavāpnoti yassākṣyamanṛtaṃ vadet
sukṛtaṃ yattvayā kiñcijjanmāntaraśataiḥ kṛtam
tatsarvaṃ tasya jānīhi yaṃ parājayase mṛṣā
abruvan hi narassākṣyamṛṇaṃ sadaśabandhakam
rājñā sarvaṃ pradāpyassyāt ṣaṭcatvāriṃśake'hani
na dadāti hi yassākṣyaṃ jānannapi narādhamaḥ
sa kūṭasākṣiṇāṃ pāpaistulyo daṇḍena caiva hi
dvaidhe bahūnāṃ vacanaṃ sameṣu guṇināṃ tathā
guṇidvaidhe tu vacanaṃ grāhyaṃ ye guṇavattarāḥ
yasyocussākṣiṇassatyaṃ pratijñāṃ sa jayī bhavet
anyathā vādino yasya dhruvastasya parājayaḥ
ukte'pi sākṣibhissākṣye yadanye guṇavattamāḥ
dviguṇā vānyathā brūyuḥ kūṭāssyussarvasākṣiṇaḥ
pṛthak pṛthagdaṇḍanīyāḥ kūṭakṛtsākṣiṇastathā
vivādād dviguṇaṃ daṇḍaṃ vivāsyo brāhmaṇastathā
yassākṣyaṃ śrāvito'nyebhyo nihnute tattamovṛtaḥ
sa dāpyo'ṣṭaguṇaṃ daṇḍaṃ brāhmaṇaṃ tu vivāsayet
varṇināṃ hi vadho yatra tatra sākṣyanṛtaṃ vadet
1) taptāvānāyaniryāpyaścatussārasvato dvijaiḥ
yaḥ kaścidartho niṣṇātaḥ svarucyātu parasparam
lekhyaṃ tu sākṣimatkāryaṃ tasmin dhanikapūrvakam
samāmāsatadardhāharnāmajātisvagotrakaiḥ
sabrahmacārikātmīyapitṛnāmādicihnitam
samāpte'rthe ṛṇī nama svahastena niveśayet
mataṃ me'mukaputrasya yadatropari lekhitam
sākṣiṇaśca svahastena pitṛnāmakapūrvakam
atrāhamamukassākṣī likheyuriti te samāḥ
ubhayābhyarthite'pyetanmayā hyamukasūnunā
likhitaṃ hyamukeneti lekhako'nte tāto likhet
vināpi sākṣibhirlekhyaṃ svahastalikhitaṃ tu yat
tatpramāṇaṃ smṛtaṃ lekhyaṃ balopadhikṛtādṛte
ṛṇaṃ lekhyakṛtaṃ deyaṃ putrairlekhibhireva tu
ādhistu bhujyate tāvadyāvattanna pradīyate