Shivattvaratnakara 97.110

97.110

deśāntarasthe durlakhye naṣṭonmṛṣṭe hṛte tathā
bhinne dagdhe'thavā cchinne lekhyamanyattu kārayet
sandigdhe lekhyaśuddhiḥ syāt svahastalikhitādibhiḥ
yuktiprāptikriyācihnasamvandhāgamahetubhiḥ
lekhyasya pṛṣṭhe'bhilikhed dattvā 1) dattvārṇiko dhanam
dhanī copagataṃ dadyāt svahastaparicihnitam
tadṛṇaṃ pāṭayellekhyaṃ śuddhyai cānyattu kārayet
sākṣimacca bhavedyadvā taddātavyaṃ sasākṣikam
tulāgnyāpo viṣaṃ kośo divyāniha viśuddhaye
mahābhiyogeṣvetāni śīrṣakasthe'bhiyoktari
rucyā vānyataraḥ kāryo varteyeditaraśśiraḥ
vinā'pi śīrṣakāt kuryānnṛpadrohe'tha pātake
sacelaṃ snātamāhūya sūryodaya upoṣitam
kārayet sarvadivyāni nṛpabrāhmaṇasannidhau
tulāstrībālavṛddhāndhapaṃgubrāhmaṇarogiṇīm
agnirjalaṃ vā śūdrasya yavāsapta viṣasya vā
nā sahasrāddharetphālaṃ na viṣaṃ na tulāṃ tathā
nṛpārtheṣvabhiśāpe ca vaheyuśśucayastathā
tulādhāraṇavidvadbhirabhiyuktastulāśritaḥ
pratimānasamībhūto rekhāṃ kṛtvāvatāritaḥ
tvaṃ tule ! satyadhāmāsi purā devairvinirmitā
tatsatyaṃ vada kalyāṇi ! saṃśayānmāṃ vimocaya
yadyasmi pāpakṛnmātastato māṃ tvamadho naya
śuddhaścedgamayordhvaṃ māṃ tulāmityabhimantrayet
tulito yadi vardheta śuddhaḥ syānnātra saṃśayaḥ
samo vā hīyamāno vā na viśuddho bhavennaraḥ
kakṣyacchede tulābhaṅge ghaṭakarkaṭayostathā
rajjuvedhaṃ'kṣabhaṅge ca tathaivāśuddhimādiśet
karau vimṛditavrīherlakṣayitvā tato nyaset
saptāśvatthasya parṇāni tāvatsūtreṇa veṣṭayet
tvamagne ! sarvabhūtānāmantaścarasi pāvakaḥ
sākṣivat puṇyapāpebhyo brūhi satyaṃ kave ! mama
tasyetyuktavato lauhaṃ pañcāśatpalikaṃ samam
agnivarṇaṃ nyaset piṇḍaṃ hastayorubhayorapi