Ashtangahridayasamhita 1.3.88.1
Sarvāṅgasundarā 1.3.88.1
- Language
- Sanskrit
1.3.88.1
śodhanīṃ vidhatte-āsthāpanamiti| śuddhatanuḥ-kṛtavirecanaḥ san, āsthāpanaṃ-bastikarma, bhajet| śamanīṃ vidhatte-jīrṇaṃ dhānyamiti| jīrṇaṃ-purāṇam| rasān-māṃsarasān| kṛtān-paṭukaṭvamlasnehayutān| piśitaṃ-māṃsam| yūṣān-dhānyakvāthān, tānapi kṛtān| madhu-mārdvīkam, ariṣṭaṃ-kvathitauṣadhamadyam, dvayamapi cirantanam| pañcakolāvacurṇitaṃ sauvarcalalavaṇāḍhyaṃ ca mastu-dadhimaṇḍam| divyaṃ-āntarikṣam| taccātītāśvinagṛhītaṃ kācādipātrastham, varṣāsu grahaṇaniṣedhāt| tadabhāve kaupam, tacca śṛtam| uktaṃ hi saṅgrahe (sū. a. 4)- "divyaṃ kvathitakūpotthaṃ cauṇḍyaṃ sārasameva ca|" iti| varṣāviśeṣe bhojanaviśeṣamāha-bhojanaṃ tviti| atidurrdine-vātavarṣākule+ahani| saṃśuṣkaṃ-kulmāṣādi| kṣaudravatsamākṣikam| vātalamapi madhu kledaghnatvātkālasāmarthyena vā avātalatvādvihitam| uktaṃ hi saṅgrahe (sū. a. 7)- "vātalaṃ vātakope+api varṣāsu madhu śasyate" iti|
Linked texts (1)
- Aṣṭāṅgahṛdayasaṃhitā — Vāgbhaṭa, Sanskrit