Ashtangahridayasamhita 1.5.116.1

1.5.116.1

mūlaṃ cāgraṃ ca jantujagdhādayaśca mūlāgrajantujagdhādayaḥ, teṣāṃ tathāvidhānāmikṣūṇāṃ pīḍanaṃ, tasmānmūlāgrajantujagdhādipīḍanāt| tathā, malasaṅkarāt-malamiśraṇāt| tathā, kiñcitkālaṃ vidhṛtyā ca-yāntrike rase svalpakālaṃ vidhṛtiḥ-vilambaśca dṛṣṭaḥ| tadetaiḥ kāraṇairyāntriko raso vikṛtiṃ yāti-svabhāvānyathātvaṃ prāpnoti| tathā-gururadhikaṃ guruḥ sampadyate, avidāhi vidāhi, aviṣṭambhī viṣṭambhī, ityevaṃvidhā+asya vikṛtiḥ| yāntrikasya ca rasasya bāhulyena loke mūlādisahitasya pīḍanātkālavilambopalabdheśca granthakṛdevaṃ samavocat| ata eva hetunirdeśo+atra kṛtaḥ, hetvabhāvātkāryābhāvapratipādanāya| tena yadā+atinipuṇadhībhirmūlādirahitaḥ pīḍyate, kālavilambitaṃ ca nopayujyate, tadā vikṛtiṃ na yātyeverthaḥ|vidāhītyādi| yato vikṛtiṃ yāti, tena-hetunā, asau yāntriko, vidāhyādiguṇaḥ sampadyate| vidāhī-jaṭharāgnisaṃyogādyaḥ pākaṃ gacchanmadhyamāyāmevāvasthāyāṃ vidahyamānaḥ pittaṃ kurvaṃścirakālamavatiṣṭhate, na drāgeva jarāṃ yāti gurutvādathavā vastusvabhāvāt, sa vidāhaguṇayukto bhāvo bhaṇyate| tasmāt gurusvābhāvyādvidāhī kathitaḥ| tathā coktaṃ dhānvantare-"śālipiṣṭamayaṃ sarvaṃ gurubhāvādvidahyate|" iti|