Ashtangasamgraha 29.2

29.2

tatra pūrveṣāṃ pratyutpannakarmajānāṃ rogāṇāṃ yathāsvaṃ pratipakṣasya hetuvyādhiviparītasya auṣadhādeḥ sevanāt praśamo bhavati | daivajānāṃ tu rogāṇāṃ yathāsvaṃ pratipakṣaśīlane satyapi pūrvakṛtāniṣṭakarmakṣayādupaśama iti sambandhaḥ| anyeṣāmubhayajānāmapathyahetukadoṣasya pūrvakarmaṇaśca kṣayādupaśamo bhavatītisambandhaḥ | anye punarācāryāḥ pareṇa śatruprabhṛtinā'pi kṛtaṃ karmābhicārādi pratyutpannamitivarṇayanti | tacca parakṛtaṃ karma parābhisaṃskāraśabdena paryāyeṇācakṣate | evañca te ācāryā rogotpattikāraṇatvena parakṛtasyotpattimāhuḥ | kathamityāha | yadi svayaṃ kṛtādeva karmaṇaḥ phalākhyakāryanirvṛttiḥ syāt dṛṣṭaśatrvādipuruṣāntarakṛtāt na syāt | tataśca vidvān paṇḍito'pi kimiti parācarite tadupakāre sukhānurodhāttoṣaṃ pratikarttavyacittaṃ vā pratipadyate | tathā kimiti parācarite tadapakāre duḥkhānurodhādroṣaṃ pratikarttavyacittaṃ vā pratipadyate | tasmādanyakṛtāt karmaṇaḥ śyenāderanyatarasya phalayroga ityanumīyate | evaṃ parakṛtakarmaṇo vyādhikāraṇatvānupraveśāt dvividhāḥ santaḥ trividhā jāyante te ca vyādhayo doṣavantaḥ santo doṣāṇāṃ pṛthaksaṃsargasannipātabhedena bhūyaḥ saptavidhā bhavanti |