Ayurvedadipika (Carakatatparyatika) 1.2.2.1
Āyurvedadīpikā (Carakatātparyaṭīkā) (ed. Yādavjī Trikamjī Ācārya, 1981 printing) 1.2.2.1
- Language
- Sanskrit
1.2.2.1
vamanadravye ādau madanamuktaṃ prādhānyāt; uktaṃ hi- “vamanadravyeṣu madanaphalāni śreṣṭhatamānyācakṣate+anapāyitvāt” iti (ka.a.1)| upasthita iti āmāśayordhvabhāge śleṣmaṇaḥ sthānaṃ gatvotkleśaṃ gata iti vyākhyeyam| śleṣmapitta iti śleṣmapitte śleṣmaṇi pitte ca| pittaṃ ca yadyapi sākṣānna vamanaviṣayaṃ tathā+api śleṣmasthānagatatvena śleṣmasambandhādvamanaviṣayam| yaduktaṃ- “doṣasthānagataṃ doṣaṃ sthānivat samupācaret” iti| dehamadūṣayanniti yadyapi vamane proktaṃ tathā+api virecanādiṣvapi boddhavyaṃ, tatrāpyatiyogāyogamithyāyogairdehaduṣṭiśaṅkāyāḥ samānatvāt| ucyate ca nyāyavidbhiryat- “samāneṣvartheṣvekatrābhihito vidhiranyatrāpyanuṣañjanīyaḥ” iti||7-8||