Virasimhavaloka 1.p7

1.p7

navakuṃbhaṃ samānīya mṛnmayaṃ cāvraṇaṃ dṛḍham | lohitaṃ karṇarahitaṃ sthāpayettaṃḍulopari || taṃḍulānāṃ parīmāṇaṃ droṇapaṃcakamiṣyate | viśuddhāstaṃḍulā grāhyāḥ śvetavastreṇa veṣṭayet || madhunāpyathavājyena guḍaśarkarayāpi ca | tilaiḥ prapūrayedadbhiryathā vibhavato naraḥ || śvetapuṣpairarcayettaṃ gaṃdhadhūpaistathāparaiḥ| homaśca pūrvavatkāryaḥ samidājyacarūtkaṭaḥ|| suvarṇaṃ ca yathāśaktyā brāhmaṇāya nivedayet| tasmai vratavate vṛttaśrutaśīlāya satkṛtam || maṃtreṇānena vidhivatpūjayitvā jvarī naraḥ| maheśa devadeveśa devadeva parātpara || kuṃbhenānena dattena jvaraḥ kṣipraṃ vinaśyatu| ekāṃtaraṃ saṃnipātaṃ tṛtīyaṃ ca caturthakam || pākṣikaṃ māsikaṃ vāpi sāṃvatsarikameva ca| nāśayetāṃ mama kṣipraṃ vāsudevamaheśvarau