Acarabhushana 12.p1.6

12.p1.6

cakāraḥ pūrvāpekṣayā samuccayārthaḥ | divā ca śirasaḥ prāvaraṇaṃ paṭādinā na kuryātkimaviśeṣeṇa | na mūtrapurīṣayoḥ karma parihāpyeti mūtrapurīṣayoḥ kriyāṃ varjayitveti tadvyākhyā | mādhavīye bhṛguḥbrāhmaṇasya sitaṃ vastraṃ nṛpate raktamulbaṇam
pītaṃ vaiśyasya śūdrasya nīlaṃ malavadiṣyate || iti
tatraiva devalaḥ-svayaṃdhautena kartavyāḥ kriyā dharmavipaścitā
na tu rajakadhautena nāhatena na kutrācit || iti
nāhateneti samastaṃ padam | ahatalakṣaṇaṃ pulastya āhaīṣaddhautaṃ navaśvetaṃ sadaśaṃ yanna dhāritam
ahataṃ tadvijānīyātsarvakarmasu pāvanam || iti
āśvalāyanaḥ-paridhānaṃ sitaṃ śastaṃ vāsaḥ prāvaraṇe tathā
paṭṭakūlaṃ yathālābhaṃ brāhmaṇasya vidhīyate
āvikaṃ trisaraṃ caiva paridhāne parityajet
śastaṃ prāvaraṇe proktaṃ sparśadoṣo na vidyate
bhojanaṃ ca malotsargaṃ kurute trisarāvṛtaḥ
prakṣālya trisaraṃ śuddhaṃ dukūlaṃ sarvadā śuci || iti
trisaramūrṇābhedaḥ | bodhāyanaḥkartavyamuttaraṃ vāsaḥ pañcasveteṣu karmasu
svādhyāyotsargadāneṣu bhuktācamanayostathā || iti
etatsarvakarmopalakṣaṇārthamanuttarīyasya karmamātraniṣedhāditi mādhavācāryāḥ | dharmapraśne'pinityamuttaraṃ vāsaḥ kāryam | iti
vyākhyā tūktā prāk | atrānukalpo dharmapraśne'piapi vā sūtramevopavītārthe | iti | vyākhyā tu prāguktā | mādhavīye
bhṛguḥvikaccho'nuttarīyaśca nagnaścāvastra eva ca
śrautaṃ smārtaṃ tathā karma na nagnaścintayedapi
nagnānāha so'pi-nagno malinavastraśca nagnaścārdhapaṭaḥ smṛtaḥ
nagnastu dagdhavastraḥ syānnagnaḥ syūtapaṭastathā || iti