Acarabhushana 23.1.9

23.1.9

atha pratimāsakṛtyam | tatra gṛhyasūtram-amāvāsyāyāmaparāhne māsikamaparapakṣasya vā'yukṣvahaḥsu pitṛbhyo'nnam̐ sam̐skṛtya dakṣiṇāgrāndarbhāmnāsanāne kalpayitvā brāhmaṇāñśucīnmantravataḥ samāṅgānyuja āmantrayate yoninigotramantrāsaṃbandhāntvārthāpekṣo bhojayedagnimupasamādhāya dakṣiṇāprāgagrairdarbhaiḥ paristīryaikapavitrāntarhitāyāmājyasthālyāmājyagm̐sagm̐skṛtya
prasavyaṃ pariṣicyaudumbaramidhmamabhyādhāyaudumbaryā darvyā juhotyājyabhāgāntaṃ kṛtvā prācīnāvītī pitṝnāvāhayati—
āyāta pitaraḥ somyā gambhīraiḥ pathibhiḥ pūrvyaiḥ
prajāmasmabhyaṃ dadato rayiṃ ca dīrghāyutvaṃ ca śataśāradaṃ ca
ityetāmeva diśamabhyapaḥ prasiñcati
āpo devīḥ prahiṇutāgnimetaṃ yajñaṃ pitaro no juṣantām
mā sīmāmūrjamūtaye bhajante te no rayigm̐ sarvavīraṃ niyacchatu
iti yajñopavītī vyāhṛtiparyantaṃ kṛtvā prācīnāvītī juhoti—
somāya pitṛmate svadhā namo yamāyāṅgirasvate pitṛmate svadhā namo
yāḥ prācīḥ saṃbhavantyāpa uttarataśca yāḥ | adbhiviśvasya bhuvanasya dhartrībhirantaranyaṃ piturddadhe svadhā namaḥ | antarddadhe parvatairantarmahyā pṛthivyā
divā digbhiranantābhirūtibhirantaranyaṃ pitāmahāddadhe svadhā namaḥ | antarddadha ṛtubhirahorātraiḥ susaṃdhibhiḥ | ardhamāsaiśca māsaiścāntaranyaṃ prapitāmahāddadhe svadhā nama ityatha nāmadheyairjuhotyamuṣmai svadhā namo'muṣmai svadhā
nama iti yanme mātā pralulobha caratyananuvratā | tanme retaḥ pitā vṛṅktāmāmuranyo'vapadyatāgm̐ svadhā nama ityevaṃ dvitīyāṃ tathā tṛtīyāṃ yanme pitāmahī prapitāmahī mantragm̐ saṃnamati