Acarabhushana 23.2

23.2

ye ceha pitaro ye ca neha yāgm̐śca vidmayāgm̐ u ca na pravidma
agne tānvettha yadi te jātavedastayā prattagm̐ svadhayā madantu svadhā namaḥ
yadvaḥ kravyādaṅgamadahallokānayaṃ praṇayaṃ jātavedāḥ
tadvo'haṃ punarāveśayāmyariṣṭāḥ sarvairaṅgaiḥ saṃbhavata pitaraḥ svadhā namaḥ
vahā''jyaṃ jātavedaḥ pitṛbhyo yatraitānvettha nihitānparāke
ājyasya kūlyā upa tānkṣarantu satyā eṣāmāśiṣaḥ santu kāmaiḥ
svadhā namaḥ
ityevaṃ dvitīyāṃ tathā tṛtīyāṃ pitāmahebhyaḥ prapitāmahebhya iti mantragm̐
saṃnamatyevamannasya juhoti vahānnāmiti mantragm̐ saṃnamatyatha sauviṣṭakṛtīṃ
juhotyagnaye kavyavāhanāya svadhā nama ityathānnamabhimṛśati pṛthivī te
pātraṃ dyaurapidhānaṃ brahmaṇastvā mukhe juhomi brāhmaṇānāṃ tvā prāṇāpānayorjuhomyakṣitamasi mā pitṝṇāṃ kṣeṣṭhā amutrāmuṣmam̐lloke pṛthivī samā tasyāgnirupadraṣṭā dattasyāpramādāya pṛthivī te pātraṃ dyaurapidhānaṃ brahmaṇastvā
mukhe juhomi brāhmaṇānāṃ tvā prāṇāpānayorjuhomyakṣitamasi mā pitāmahānāṃ kṣeṣṭhā amutrāmuṣmam̐lloke'ntarikṣagm̐ samaṃ tasya vāyurupadraṣṭā dattasyāpramādāya pṛthivī te pātraṃ dyaurapidhānaṃ brahmaṇastvā mukhe juhomi brāhmaṇānāṃ tvā prāṇāpānayorjuhomyakṣitamasi mā prapitāmahānāṃ kṣeṣṭhā amutrāmuṣmam̐lloke dyauḥ samā tasyā''ditya upadraṣṭā dattasyāpramādāyeti
brāhmaṇānupasparśayati prāṇe niviśyāmṛtaṃ juhomīti