Acarendu 1.p43

1.p43

aharahaḥ sandhyāmupāsīta yāvajjīvamagnihotraṃ juhuyāt| evamādīni nityodāharaṇāni | jīvanakāmnāvyatiriktaṃ jāteṣṭigrahaṇāyanasnānādi aniyatanimittamupajīvya pravṛttaṃ naimittikam | kāmanayā pravṛttaṃ varṣakāmeṣṭiḥkārīrītyādikaṃ kāmyam | tatra nitye karmaṇi aśakyāṅgaparityāgena pradhānaṃ kartavyaṃ tāvataiva śāstravaśātphalasiddhiriti ṣaṣṭhādhyāye tṛtīyapāde mīmāṃsitam | baudhāyanasmṛtirapiyathā kathañcinnityāni śakyavastvanurūpataḥ | yena kenāpi kāryāṇi naiva nityāni lopayet || iti | yathākathañcit | kiñcidaṅgahānenāpi yena kenāpi svataḥ parato vetyartha iti ācāraratne | nityānīti naimittikaprārabdhakāmyopalakṣaṇam| naimittikasyāpyakaraṇe prāyaścittaśravaṇāt | prārabdhakāmyaṃ nityāyata iti nyāyācca | anārabdhakāmyaṃ tu sampūrṇānuṣṭhānaśaktau satyāmeva 1kartavyamiti ṣaṣṭhādyapāde siddhāntitam | vyāsaḥśrautaṃ karma na cecchaktaḥ kartuṃ smārtaṃ samācaret | tatrāpyaśaktaḥ karaṇe sadācāraṃ labheda budhaḥ || sadācāraḥ snānasandhyādiḥ | atrāśaktirdravyābhāvādvyādhitatvājjñānābhāvācceti bahuvidhā | arthī samartho vidvāñchāstreṇāparyudastaścādhikārīti siddhāntāt| karmaṇi praśastaṃ jalamāha devalaḥavigandhā rasopetā nirmalāḥ pṛthivīgatāḥ | akṣīṇāścaiva gopānādāpaḥ śuddhikarāḥ smṛtāḥ || uddhṛtā vā praśastāḥ syuḥ śuddhaiḥ pātrairyathāvidhi | ekarātroṣitāstāstu tyajedāpaḥ samuddhṛtāḥ || tā iti sarvanāmnā prakṛtā gotṛptimātraparyāptā alpā evā''paḥ parāmṛśyante | ato bahūdakāttaḍāgāderuddhṛtānāṃ rātryuṣitānāṃ na doṣaḥ