Acarendu 1.p48

1.p48

patitāntyajacāṇḍālādīnāṃ yāvacca śabdakaḥ | tāvatkarma na kartavyaṃ tathā sandhyādvaye'pi ca || anullaṅghya svaśāstroktavidhiṃ karma samācaret | karmānyathā kṛtaṃ jñātvā tāvadeva punaścaret || pradhānasyākriyāyāṃ tu sāṅgaṃ tatpunarācaret | tadaṅgākaraṇe prāyaścittameva na karma tat || kadaṅgasparśane vāmo hasto'nyasparśane'nyakaḥ | nābhyadhoṅgānyāsanti syurnābhyūrdhvaṃ syustu santi vai || nābhau tvanyataro hasta iti jñeyaṃ vicakṣaṇaiḥ | kararogo yadi tadobhayatrobhāvapi smṛtau || avaidhaṃ nābhyadhaḥ sparśaṃ karmakāle na cā''caret | raktapūyaretādisparśe tu snānaṃ prakīrtitam || prāksaṃsthaṃ karma devānāmugdigapavargakam | udagdiksaṃsthamatha vā prācīdigapavargakam || dakṣiṇāśāpavargaṃ tu pratyagdiksaṃsthameva hi | pitryaṃ karma prakartavyaṃ spaṣṭaṃ yadi vaco bhavet || aṅgopasparśane vastradaśāsaṃsparśane tathā | chedane bhedane caiva nirāse khanane tathā || paitṛke rākṣase raudre nairṛte cā''bhicārike | eteṣu vai nimitteṣu jalopasparśanaṃ bhavet || adhovāyusamutsarge prahāse'nṛtabhāṣaṇe | mārjāramūṣakasparśa ākrande krodhasambhave || nimitteṣveṣu sarveṣu karma kurvannapaḥ spṛśet || nivītitā mānuṣe syāddaive yajñopavītitā | prācīnāvītitā tu syātpitrye spaṣṭaṃ vaco yadi || vihāraḥ pṛṣṭhato naiva prakartavyaḥ kadācana | pātrāṇyājyaṃ havirbarhireteṣvantaḥ kramātparam || kartārastu bahirbhūtā evaiṣvantastu homakṛt | bahirbhūtastato brahmā'nyebhyo'ntarbhūta īritaḥ || sarveṣveteṣu patnyantastato'pyantaḥ patirbhavet | etatsarvatra vijñeyaṃ viśeṣavidhinā vinā || avijñātasvarā mantrāḥ prayoktavyāḥ prayoktṛbhiḥ | ekaśrutyaiva sarvatra jayantasvāmibhāṣaṇāt || sautreṣvṛṣyādivijñānaṃ netyuktaṃ pārijātake | karmaśiṣṭodakaṃ karmasamāptau tu parityajet || anādeśe dakṣiṇā gaurhema vā pūrṇapātrakam | devakārye naiva deyaṃ rajataṃ tvaśrujaṃ hi tat || pātraṃ padopasaṃspṛṣṭaṃ prakṣālyaṃ sarvathā budhaiḥ | hutaṃ yanmāṃsadhautena tanna bhuṅkte hi devatā || pātrāṇāṃ śodhanaṃ nātaḥ kāryaṃ kevalahastataḥ | kiṃ tu darbhaistṛṇairvā'pi parṇairvā vāsasā'pi vā || sarveṣu dharmakāryeṣu patnī dakṣiṇato bhavet | abhiṣeke viprapādakṣālane vāmataḥ smṛtā || yannā''mnātaṃ svaśākhāyāṃ pārakyamavirodhi yat | ākāṅkṣitaṃ śeṣabhūtamanuṣṭheyaṃ vicakṣaṇaiḥ || tatkṛtau phalavaiśiṣṭyaṃ na doṣastvakṛtau bhavet || iti