Acarendu 2.p10

2.p10

prātaḥ smarāmi bhavabhītimahārtiśāntyai nārāyaṇaṃ garuḍavāhanamabjanābham | grāhābhibhūtavaravāraṇamuktihetuṃ cakrāyudhaṃ taruṇavārijapatranetram || 1|| prātarnamāmi manasā vacasā ca mūrdhnā pādāravindayugalaṃ paramasya puṃsaḥ| nārāyaṇasya narakārṇavatāraṇasya pārāyaṇapravaṇavipraparāyaṇasya || 2|| prātarbhajāmi bhajatāmabhayaṅkaraṃ taṃ prāksarvajanmakṛtapāpabhayāpahatyai | yo grāhavaktrapatitāṅghrigajendraghoraśokapraṇāśamakarodhṛtaśaṅkhacakraḥ || 3|| ślokatrayamidaṃ puṇyaṃ prātaḥ prātaḥ paṭhennaraḥ | lokatrayagurustasmai dadyādātmapadaṃ hariḥ || atha śrīrāmāvatārasyānyatraprātaḥ smarāmi raghunāthamukhāravindaṃ mandasmitaṃ madhurabhāṣi viśālabhālam | karṇāvalambicalakuṇḍalagaṇḍaśobhaṃ karṇāntadīrghanayanaṃ nayanābhirāmam || 1|| prātarbhajāmi raghunāthakarāravindaṃ rakṣogaṇāya bhayadaṃ varadaṃ nijebhyaḥ | yadrājasaṃsadi vibhajya maheśacāpaṃ sītākaragrahaṇamaṅgalamāpa sadyaḥ || 2|| prātarnamāmi raghunāthapadāravindaṃ padmāṅkuśādiśubharekhi śubhāvahaṃ me | yogīndramānasamadhuvratasevyamānaṃ śāpāpahaṃ sapadi gautamadharmapatnyāḥ || 3|| prātaḥ śraye śrutimitāṃ raghunāthamūrtiṃ nīlāmbujekṣaṇasitetararatnanīlām | āmuktamauktikaviśeṣavibhūṣaṇāḍhyāṃ dhyeyāṃ samastamunibhirhṛdayārtihantrīm || 4|| prātarvadāmi vacasā raghunāthanāma vāgdoṣahāri sakalaṃ śamalaṃ1 nihanti | yatpārvatī svapatinā saha bhoktukāmā prītyā sahasraharināmasamaṃ jajāpa || 5