Acarendu 2.p29

2.p29

atra māṣaḥ suvarṇasya, taduktamācāraprakāśa uśanasā - māṣasuvarṇamajjanamātrā hṛdayaṅgamā iti | anvārambhamāha yamaḥtāvannopaspṛśedvidvān yāvadvāmena na spṛśet | dakṣiṇaṃ karamiti śeṣaḥ | ācārapradīpedakṣiṇe saṃsthitaṃ toyaṃ tarjanyā savyapāṇinā | tattoyaṃ spṛśate yastu somapānaphalaṃ bhavet || kecittvidaṃ nirmūlamityāhuriti dyote (?) smṛtyarthasāre sauvarṇaraupyapātraistu veṇubilvāśmacarmabhiḥ | vāmenoddhṛtya cā''cāmediti| pārijāte saṅgrahekarakālābupātreṇa tāmrapātrapuṭena ca | gṛhītvā svayamācāmedbhūmi lagnena nānyathā || atra bhūmilagnatve mānaṃ cintyam | vāmenoddhṛtyeti smṛtyarthasāravirodhādityācāraratne | kamalākare manuḥkāṃsyenā''yasapātreṇa trapusīsakapittalaiḥ | ācāntaḥ śatakṛtvo'pi na kadācana śudhyati || śaunakaḥtāmrapātrasthitairvā'pi tathā toyāśayasthitaiḥ | kurvannācamanaṃ vipro nityaṃ khāni samālabheta || paurāṇācamanaprayogaḥ| śucau deśe bhūmiṣṭhapādo'ntarjānuhastaḥ prāṅmukha udaṅmukho vopaviśya saṃhatāṅgulinā śuddhajalaṃ gṛhītvā muktāṅguṣṭhakaniṣṭhikena vāmānvārabdhena pāṇinā brahmatīrthena oṃ keśavāya namaḥ | oṃ nārāyaṇāya namaḥ | oṃ mādhavāya namaḥ | iti tribhirnāmabhistriḥ pibet| praṇavādyatā namo'ntatā ca sarvatra | oṃ govindāya0 oṃ viṣṇave0 iti dvābhyāṃ karau prakṣālya oṃ madhusūdanāya0 oṃ trivikramāya0 iti dvābhyāmaṅguṣṭhamūlenauṣṭhau saṃmṛjya oṃ vāmanāya0 oṃ śrīdharāya0 iti dvābhyāṃ tathaiva mukhamunmārjya oṃhṛṣīkeśāya0 iti vāmakaraṃ prokṣya oṃ padmanābhāya0 iti pādau saṃprokṣya oṃ dāmodarāya0 iti mūrdhānaṃ saṃprokṣya oṃ saṅkarṣaṇāya0 iti saṃhatamadhyamāṅgulitrayeṇā''syaṃ saṃspṛśya oṃ vāsudevāyaḥ0 oṃ pradyumnāya0 iti dvābhyāmaṅguṣṭhatarjanībhyāṃ nāsāpuṭe saṃspṛśya oṃ aniruddhāya0 oṃ puruṣottamāya0 iti dvābhyāmaṅguṣṭhānāmikābhyāṃ cakṣuṣī saṃspṛśya oṃ adhokṣajāya0 oṃ nārasiṃhāya0 iti dvābhyāṃ tathaiva śrotre saṃspṛśya oṃ acyutāya0 iti kaniṣṭhāṅguṣṭhābhyāṃ nābhiṃ saṃspṛśya oṃ janārdanāya0 iti pāṇitalena hṛdayaṃ saṃspṛśya oṃ upendrāya0 iti sarvāṅgulyagraiḥ śiraḥ saṃspṛśya oṃ haraye0 oṃ kṛṣṇāya0 iti dvābhyāṃ tathaiva dakṣiṇavāmabāhumūle spṛśet | etatpratyaṅgamadbhiḥ saṃspṛśannācāmet| imāni nāmāni prathamaikavacanāntāni sambuddhyantāni voccāryāṇītyāhnikacandrikāyām