Acarendu 2.p7

2.p7

vedatattvārthaḥ paramātmā | āgamebrāhme muhūrte cotthāya cintayedraghunandanam | śrīpūrvaṃ jayamadhyasthaṃ vijayāntaṃ vicakṣaṇaḥ || aṅgirāḥutthāya paścime yāme rātrivāsaḥ parityajet | prakṣālya hastapādāsyāmyupaspṛśya hariṃ smaret || viṣṇuḥutthāyotthāya boddhavyaṃ kimadya sukṛtaṃ kṛtam | dattaṃ vā dāpitaṃ vā'pi vāksatyā cāpi bhāṣitā || utthāyotthāya boddhavyaṃ mahadbhayamupasthitam | maraṇavyādhiśokānāṃ kimadya nipattiṣyati || iti | pariśiṣṭe-prabhāta iṣṭadevatāṃ manasā natvā tadahaḥkṛtyaṃ smṛtvā dharmaśāstroktavidhinā mūtrapurīṣotsargādi kuryāditi | prātaḥsmaraṇaṃ ca pitāmahoktabrāhmamuhūrtamārabhya kāryamiti kecit | anye tu dvitīyabrāhmamuhūrtamārabhya prātaḥsmaraṇaṃ kāryaṃ pitāmahoktastu vedābhyāsārthamityāhuḥ yuktaṃ caitat | rātrerantimayāme tu dvijo vedaṃ vicintayediti kātyāyanokteḥ| atra svāpe prāyaścittamuktaṃ smṛtiratnāvalyāmbrāhme muhūrte yā nidrā sā puṇyakṣayakāriṇī | tāṃ karoti tu yo mohātpādakṛcchreṇa śudhyati || idaṃ ca prāyaścittaṃ vyādhirahitānāmevetyācāraratne | sūryāstodayakālasvāpe tvāśvalāyanaḥ-avyādhitaṃ cetsvapantamādityo'bhyastamiṣādvāgyato'nupaviśan rātriśeṣaṃ bhūtvā yena sūryajyotiṣā bādhase tama iti pañcabhirādityamupatiṣṭhetābhyudiyāccedakarmaśrāntamanabhīrūpeṇa karmaṇā vāgyata iti samānamuttarābhiścatasṛbhirupasthānamiti | avyādhitaṃ svapantamāditya udayaṃ prāpnotyastamito vā bhavati| yadā rāgataḥ prāptanṛtyādikarmaṇā śrānta eva nidrā tadedaṃ prāyaścittaṃ vihitakarmaśrānte tu netyarthaḥ | atha prātaḥsmaraṇam | tatra ṛgvidhāne- prātaragniṃ prātarindram0 ṛk 6| prātaryāvāṇāpratha0 ṛ0 5 prātā ratho navo0 ṛ0 7 punaḥ punaḥpunarjāya0 ṛ0 1 | vāmanapurāṇebrāhme muhūrte prathamaṃ vibudhyedanusmareddevavarānmunīṃśca || iti | devavarāḥ pañcāyatanadevatādayaḥ | pañcāyatanadevatākramastu padmapurāṇeādityaṃ gaṇanāṃthaṃ ca devīṃ rudraṃ yathākramam | nārāyaṇaṃ viśuddhākhyamante ca kuladevatām || tatra tāvacchrīsūryādeḥ smaraṇamuktaṃ dharmacintāmaṇauprātaḥ smarāmi khalu tatsaviturvareṇyaṃ rūpaṃ hi maṇḍalamṛco'tha tanuryajūṃṣi | sāmāni yasya kiraṇāḥ prabhavādihetuṃ brahmāharātmakamalakṣyamacintyarūpam || 1|| prātarnamāmi taraṇiṃ tanuvāṅmanobhirbrahmendrapūrvakasurairnutamarcitaṃ ca | vṛṣṭipramocanavinigrahahetubhūtaṃ trailokyapālanaparaṃ triguṇātmakaṃ ca || 2|| prātarbhajāmi savitāramanantaśaktiṃ pāpaughaśatrubhayarogaharaṃ paraṃ ca | taṃ sarvalokakalanātmakakālamūrtiṃ gokaṇṭhabandhanavimocanamādidevam ||3|| ślokatrayamidaṃ bhānoḥ prātaḥ prātaḥ paṭhettu yaḥ | sa sarvavyādhinirmuktaḥ paramaṃ sukhamāpnuyāt || atha śrīgaṇeśasya tatraivaprātaḥ smarāmi gaṇanāthamanāthabandhuṃ1 sindūrapūrṇapariśobhitagaṇḍayugmam | uddaṇḍavighnaparikhaṇḍanacaṇḍadaṇḍamākhaṇḍalādisuranāyakavṛndavandyam || 1