Acarendu 4.p27

4.p27

atha snānavidhāvācāraratnamayūkhādidhṛtapariśiṣṭamatha snānavidhistatprātarmadhyāhne ca gṛhasthaḥ kuryādekataratra vā prātareva brahmacārī yatistriṣu savaneṣu dvistrirvā vānaprasthastatprātaḥ saha gomayena kuryānmṛdā madhyandine sāyaṃ śuddhābhiradbhirna prātaḥsnānātprāksandhyāmupāsīta prātarutsṛṣṭaṃ gomayamāntarikṣasthaṃ saṅgṛhya bhūmiṣṭhaṃ coparyadhaśca santyajya tīrthametya dhautapāṇipādamukha ācamya sandhyoktavadātmābhyukṣaṇādi kṛtvā dvirācamya saṃyataprāṇaḥ karma saṅkalpya gomayaṃ vīkṣitamādāya savye pāṇau kṛtvā vyāhṛtibhistridhā vibhajya dakṣiṇabhāgaṃ praṇavena dikṣu nikṣipyottarabhāgaṃ tīrthe kṣiptvā madhyamaṃ mā nastoka ityṛcā'bhimantrya gandhadvārāmityṛcā mūrdhādisarvāṅgamālipya prāñjalirraruṇaṃ hiraṇyaśṛṅgamini dvābhyāmava te hela iti dvābhyāṃ prasamrāje bṛhadarceti sūktena ca samprārthyahiraṇyaśṛṅgaṃ varuṇaṃ prapadye tīrthaṃ me dehi yācitaḥ | yanmayā bhuktamasādhūnāṃ pāpebhyaśca pratigrahaḥ || yanme manasā vācā karmaṇā vā duṣkṛtaṃ kṛtam | tanna indro varuṇo bṛhaspatiḥ savitā ca punantu punaḥ punaḥ || ityatha yāḥ pravata ityetayā tīrthamabhimṛśyāvagāhya snāto dvirācamya mārjayedambayo yantyadhvabhirityaṣṭābhirāpo hiṣṭhā mayobhuva iti navabhiratha tīrthamaṅguṣṭhenemaṃ me gaṅga ityṛcā triḥ pradakṣiṇamāloḍya prakāśapṛṣṭhamagno'ghamarṣaṇasūktaṃ trirāvṛtya nimajjyonmajjyā''dityamālokya dvādaśakṛtva āplutya pāṇibhyāṃ śaṅkhamudrayā vodakamādāya mūrdhni mukhe bāhvorurasi cā''tmānaṃ gāyatryā'bhiṣiñcaṃstvaṃ no agne varuṇasya vidvāniti dvābhyāṃ taratsamandī dhāvatīti sūktena punaḥ snāyānmūrdhni cābhiṣiñcettadviṣṇoḥ paramaṃ padamagne rakṣā ṇo aṃhaso yatkiñcedaṃ varuṇa daivye jana ityetā japetsrotaso'bhimukhaṃ saritsu snāyādanyatrā''dityābhimukho'tha sākṣatābhiradbhiḥ prāṅmukha upavītī devatīrthena vyāhṛtibhirvyastasamastābhirbrahmādidevatāḥ sakṛtsakṛttarpayitvā'thodaṅmukho nivītī sayavābhiradbhiḥ prājāpatyena tīrthena kṛṣṇadvaipāyanādīnṛṣīnvyastasamastābhirvyāhṛtibhirdvirdvistarpayitvā'tha dakṣiṇāmukhaḥ prācīnāvītī pitṛtīrthena satilābhiradbhirvyāhṛtibhireva somaḥ pitṛmānyamo'ṅgirasvānagniṣvāttā agniḥ kavyavāhana ityādīṃstristristarpayettatsnānāṅgatarpaṇamatha tīrametya dakṣiṇāmukhaḥ prācīnāvītī | ye ke cāsmatkule jātā aputrā gotriṇo mṛtāḥ | te gṛhṇantu mayā dattaṃ vastraniṣpīḍanodakam || iti vastraṃ niṣpīḍyopavītyapa upaspṛśya paridhānīyamabhyukṣya paridhāya dvitīyaṃ cottarīyaṃ paryukṣitaṃ prāvṛtya dvirācāmedathoktavatsandhyāmupāsītedaṃ prātaḥ snānavidhānamiti | atha prayogaḥ | antarikṣasthaṃ gomayaṃ bhūmiṣṭhaṃ ceduparyadhaśca santyaktaṃ gṛhītvā tilayavakuśānbhasmagopīcandanādikaṃ ca gṛhītvā tīrthādijalasamīpaṃ gatvoddhṛtajalairbahireva hastau pādau mukhaṃ ca prakṣālya nivītaṃ yajñopavītaṃ kṛtvā prakṣālya yajñopavītī baddhakacchaśikha ācamya oṃ bhūrbhuvaḥ svarityātmānamabhyukṣya dvirācamya prāṇānāyamya deśakālau saṅkīrtya mama kāyavāṅmanaḥkṛtakarmadoṣaparihārapūrvakaṃ sarvakarmasu śuddhyarthaṃ nityavidhirūpaṃ prātaḥsnānaṃ kariṣya iti saṅkalpya vīkṣitaṃ gomayamādāya savye pāṇau nidhāya oṃ bhūrbhuvaḥ svariti tredhā vibhajya dakṣiṇabhāgamomiti mantrāvṛttyā prācyādidaśadikṣu kṣiptvottarabhāgaṃ tūṣṇīṃ tīrthe kṣiptvā madhyamabhāgaṃ gṛhītvā mā nastoketi kutso rudro jagatī gomayābhimantraṇe vi0oṃ mā nastoke0 tanaye mā0 ṛ.1 ityabhimantrya oṃ gandhadvārāṃ durā0 ṛ. 1 iti mūrdhādisarvāṅgamālipya prāñjalivaruṇaṃ prārthayet | tatra mantrāḥ | oṃ hiraṇyaśṛṅgaṃ varuṇaṃ0 ṛ. 2 ava te hela iti dvayorājīgārtiḥ śunaḥśepo varuṇastriṣṭup | varuṇaprārthane vini0 oṃ ava te helo varuṇa na0 ṛ. 2 prasamrāja ityaṣṭarcasya sūktasya bhaumo'triṛṣiḥ | varuṇo devatā | triṣṭupchandaḥ| varuṇaprārthane vi0 oṃ prasamrāje bṛhadarcā gabhīraṃ0 ṛ. 8 | yāḥ pravata ityasya vasiṣṭho 1nadyo'tijagatī| tīrthābhimarśane vi0 | oṃ yāḥ pravato nivata0 ṛ. 1| tato baddhaśikhā svapurataḥ kṛtvā nābhimātrajale gatvā pravahajjale pravāhābhimukho'nyatrārkābhimukhastrivāramavagāhya śarīraṃ prakṣālya dvirācamya mārjayet | ambayo yantyadhvabhirityaṣṭarcasya kāṇvo medhātithirṛṣiḥ | ādyānāṃ