Acarendu 4.p37

4.p37

śiśorabhyukṣaṇaṃ proktaṃ bālasyā''camanaṃ smṛtam| rajasvalādisaṃsparśe snānameva kumārake || śiśustvannaprāśanātprāgācaulaṃ bālakaḥ smṛtaḥ | kumārakastu vijñeyo yāvanmauñjīnibandhanam || || iti naimittikasnānam || atha kāmyam śaṅkhaḥpuṣyasnānādikaṃ yattu daivajñavidhicoditam | taddhi kāmyaṃ samuddiṣṭaṃ nākāmastatprayojayet || pulastyaḥpuṣye ca janamanakṣatre vyatīpāte ca vaidhṛtau | amāyāṃ ca nadīsnānaṃ punātyāsaptamaṃ kulam || ādityapurāṇeguruvāre'pyamāvāsyāmaśvatthacchāyāvāriṇi | snānaṃ prayāgasnānena samaṃ pātakanāśanam || prārthanāmantraḥjīvo bṛhaspatiḥ saurirācāryo gururaṅgirāḥ | vācaspatirdevamantrī śubhaṃ kuryātsadā mama || || iti kāmyasnānam || atha kriyāṅgam śaṅkhaḥjaptukāmaḥ pavitrāṇi arciṣyan devatāḥ pitṝn | snānaṃ samācaredyastu kriyāṅgaṃ tatprakīrtitam || atha malāpakarṣaṇasnānam | sa evamalāpakarṣaṇaṃ nāma snānamabhyaṅgapūrvakam | malāpakarṣaṇārthā tu pravṛttistasya nānyathā || baudhāyanaḥnandāsu caiva riktāsu pūrṇāsu ca jayāsu ca | dvādaśyāṃ caiva saptamyāṃ vyatīpāte savaidhṛtau || ravisaṅkramaṇe caiva nābhyaṅgasnānamācaret || anye ca niṣedhā granthāntarājjñeyāḥ | te ca sarve rāgaprāptaviṣayā iti hemādriḥ | puruṣārthacintāmaṇauupoṣitasya klinnasya kṛttakeśanakhasya ca | tāvacchrīstiṣṭhati prītyā yāvattailaṃ na saṃspṛśet || pracetāḥtailābhyaṅganiṣedhe tu tilatailaṃ niṣidhyate | tadapi śuddhameva| ata eva bṛhaspatiḥsaṅkrāntyāṃ ravivāre ca ṣaṣṭhyāṃ bhaumadine tathā | dravyāntarayutaṃ tailaṃ na duṣyati kadācana|| yamo'pighṛtaṃ ca sārṣapaṃ tailaṃ yattailaṃ puṣpavāsitam | na doṣaḥ pakvataile 1 tu snānābhyaṅgeṣu nityaśaḥ || yatra tvabhyaṅgasyaiva niṣedhastatra sārṣapādyapi niṣidhyate | abhyaṅgasya niṣedhe tu sārṣapāderniṣiddhatā || iti pracetaḥsmaraṇāt | abhyaṅgalakṣaṇamāyurvedemūrdhni dattaṃ yadā tailaṃ bhavetsarvāṅgasaṅgatam | srotoni ( ? )tarpayedvāhūnabhyaṅgaḥ sa udāhṛtaḥ || anyatra tuśirobhyaṅgāvaśiṣṭena tailenāṅgaṃ na lepayet || ityuktam | iti malāpakarṣaṇasnānam