Acarendu 4.p38

4.p38

atha kriyāsnānam | śaṅkhaḥsaraḥsu devakhāteṣu tīrtheṣu ca nadīṣu ca | kriyāsnānaṃ samuddiṣṭaṃ snānaṃ tatra kriyā matā || tathāyattu tīrthādiṣu snānaṃ kriyāsnānaṃ prakīrtitam | snānameva phalaṃ yattu kriyāsnānaṃ prakīrtitam || iti kriyāsnānāntāḥ ṣaṇmukhyasnānabhedāḥ | anekeṣāṃ snānānāmekakālasannipāte nityanaimittikakāmyānāmuttarottareṇa pūrvapūrvasya prasaṅgasiddhiḥ| anyeṣāṃ tantratā | naikakāle dvayaṃ snānamiti vyāghrapādasmṛteḥ | tatra saṅkrāntinimittanityasnānayoḥ sannipāte saṅkrāntinimittaṃ snānaṃ kariṣya iti saṅkalpya snānaṃ kāryam | tena nityasnānasyāpi siddhiḥ| iyaṃ prasaṅgasiddhiḥ | madhyāhnasnānadarśaśrāddhāṅgasnānasannipāte madhyāhnasnānaṃ darśaśrāddhāṅgasnānaṃ ca tantreṇa kariṣya iti saṅkalpya snāyāt | tena snānadvayasiddhiḥ | idaṃ tantrodāharaṇam | athāśaktāvaśiraskasnānamāha jābāliḥaśiraskaṃ bhavetsnānaṃ snānāśaktau tu karmiṇām | smṛtisārecakṣūrogī śirorogī karṇarogī kaphādhikaḥ || kaṇṭhasnānaṃ prakurvīta śiraḥsnānasamaṃ hi tat | tathāśirorogī jaṭī caiva snāyādaśirasaṃ tathā | āpo hi ṣṭhādibhirmantrairmārjayenmūrdhni vai jalam || ityaśiraskasnānam | atha gauṇasnānāni | yogayājñavalkyaḥasāmarthyāccharīrasya kālaśaktyādyapekṣayā | mantrasnānāditaḥ sapta kecidicchanti sūrayaḥ || māntraṃ bhaumaṃ tathā''gneyaṃ vāyavyaṃ divyameva ca | vāruṇaṃ mānasaṃ caiva sapta snānānyanukramāt