Acarendu 5.p11

5.p11

iti viśvāmitroktamuttarīyasthānāpannaṃ tṛtīyamupavītamapi niṣiddham | dvitīyavastramātraṃ tu tasyāpi bhavatyeva| ekavastrasya karmaniṣedhāt | jātūkarṇyaḥabhāvaśceddvitīyasya vastracīraṃ tadā bhavet || asyāpyasambhave pāraskaragṛho-ekaṃ cedvāso bhavati tasyaivottarabhāgeṇa pracchādayatīti| dhautavastrābhāve tūśanāsnātvā'nupahataṃ vastraṃ paridadhyādyathāvidhi | abhāve pūrvavastraṃ vā samprokṣya praṇavena tu || anupahatamaparihatam | śuṣkavastrābhāve smṛtiratnāvalyāmsaptavātāhataṃ cā''rdraṃ śuṣkavatpratipādayet | nīlīvastraniṣedho bhaviṣyenīlīraktaṃ yadā vastraṃ viprastvaṅgeṣu dhārayet | ahorātroṣito bhūtvā pañcagavyena śudhyati || ayaṃ ca nīlīniṣedhaḥ kārpāsa eva | ūrṇāyāṃ paṭṭavastre vā nīlīrāgo na duṣyati | iti tatraivokteḥ | bhṛguḥstrīdhṛtā śayane nīlī brāhmaṇasya na duṣyati | bhārateanyadeva bhavedvāsaḥ śayanīye narādhipa | anyadrathyāsu devānāmārcāyāmanyadeva hi || anyacca lokayātrāyāmanyadīśvaradarśane || sumantuḥanyatsnāne tathā pāne bhojane cānyadeva hi | vastraśoṣaṇaprakāramāha śātātapaḥprāgagramudagagraṃ vā dhautaṃ vastraṃ prasārayet | paścimāgraṃ dakṣiṇāgraṃ punaḥ prakṣālanācchuciḥ || || ityācārendau snānottarakṛtyam | atha tilakadhāraṇam