Acarendu 8.p23

8.p23

dhyātvā''vāhya japediti| sandhyādevatā vasiṣṭhena spaṣṭīkṛtāyā sandhyā sā jagatsphūrtirmāyātītā hi niṣkalā| īśvarī kevalā śaktirvedatrayasamudbhavā || dhyātvā'rkamaṇḍalagatāṃ sāvitrīṃ vai japedbudhaḥ || anenārkabimbābhivyaktamādityaśabdavācyaparabrahmarūpacicchaktireva sandhyādevatetyuktaṃ bhavati| āvāhanamantraḥ pariśiṣṭeāgaccha varade devi japye me sannidhau bhava | gāyantaṃ trāyase yasmādgāyatrī tvaṃ tataḥ smṛtā || vyāsaḥāvāhayeta gāyatrīṃ sarvapāpapraṇāśanīm | āgaccha varade0 smṛtā japye ma ityatra yakāraviśiṣṭaḥ sannidhāvityatra saptamyantaśca pāṭhaḥ samīcīnaḥ | atha japamālā| pariśiṣṭam - japaṃ cākṣasūtreṇānāmikāyā madhyādārabhya pradakṣiṇaṃ daśabhiraṅguliparvabhirvā gaṇayet| yadyapyatrāviśeṣeṇākṣamālākaramālayorvikalpa uktastathāpi | parvabhistu japeddevī mālā kāmyajape smṛtā | gāyatryā vedamūlatvādvedaḥ parvasu gīyate || ārabhyānāmikāmadhyaṃ parva devīmanukramāt | tarjanīmūlaparyantaṃ japeddaśasu parvasu || madhyamāṅgulimūle tu yatparvadvitayaṃ bhavet | taṃ vai meruṃ vijānīyājjapettaṃ nātilaṅghayet || iti brahmayāmalavaco'nurodhena sandhyāṅgajape karamālā puraścaraṇajape'kṣamāleti vyavasthitirjñeyeti kecit | anye tu brahmayāmalavacanasya śākhāntare sāvakāśatvātpaścimamukhaḥ sūryābhimukhaṃ vā'kṣamālāmādāya tāṃ dhyāyañjapediti śaṅkhasmṛtyanugrāhakapariśiṣṭādāśvalāyanānāmakṣakaramālayoḥ samavikalpamāhuḥ| atra parvaśabdo rekhāvacanaḥ pradeśinyāḥ parvaṇī uttame iti sūtravṛttau tathaivoktatvāt | ato'nāmikāmadhyarekhāmādiṃ kṛtvā tadadhaḥ krameṇa prādakṣiṇyena tarjanyādirekhāyāṃ samāptiḥ| parvaśabdo'tra kāṇḍavacana iti kecit | tanmate'nāmikādvitīyakāṇḍaprabhṛtigaṇanā tarjanyādikāṇḍe samāptiḥ | vṛddhamanuḥ— vastreṇā''cchādya tu karaṃ dakṣiṇaṃ yaḥ sadā japet | tasya syātsaphalaṃ japyaṃ taddhīnamaphalaṃ smṛtam || ata eva tiryaksañcikā kenacidbuddhimatā vṛddhena japaśīlena japārthe kalpitā sā ca gomukhīti vyavahriyate tasyāstvanyatkiñcinmūlaṃ na paśyāmaḥ| mantrārthaḥ pariśiṣṭe — yaḥ savitā no'smākaṃ dhiyo dharmādiviṣayabuddhīḥ pracodayātprerayettadvareṇyaṃ varaṇīyaṃ devasya saviturbhargaḥ pāpabhañjanaṃ tejomayaṃ rūpaṃ vayaṃ dhīmahi dhyāyemeti| pārijāte sandhyākalpe— prātarnābhau karau dhṛtvā madhyāhne hṛdi saṃsthitau | sāyaṃ japastu nāsāgre trisandhyaṃ japalakṣaṇam || smṛtyantare tu sāyaṃ mukhasamau karāvityuktam | śaunakaḥ— kṛtvottānāv karau prātaḥ sāyaṃ cādhomukhau karau| madhye sammukhahastābhyāṃ japa evamudāhṛtaḥ || iti | japastrividhaḥ| nṛsiṃhapurāṇe— trividho japayajñaḥ syāttasya bhedaṃ nibodhata | vācikaśca upāṃśuśca mānasastrividhaḥ smṛtaḥ || trayāṇāṃ japayajñānāṃ śreyānsyāduttarottaraḥ || vācikatvopāṃśutvayorlakṣaṇaṃ purāṇe'bhihitam— yaduccanīcasvaritaiḥ śabdaiḥ spaṣṭapadākṣaraiḥ | mantramuccārayedvācā vāciko'yaṃ japaḥ smṛtaḥ || śanairuccārayenmantramīṣadoṣṭhau pracālayet | aparairaśrutaḥ kiñcitsa upāṃśu japaḥ smṛtaḥ || viśvāmitraḥdhiyā yadakṣaraśreṇyā varṇādvarṇaṃ padātpadam | śabdārthacintanaṃ bhūyaḥ kathyate mānaso japaḥ