Acarendu 8.p39

8.p39

pṛthvīcandrodayaḥ | agniścairṣiḥ prakṛtiśchandaḥ sūryamanyumanyupatirātrayo devatā iti candrikāmadanapārijātau| āpaḥ punantvityasyāgniścetyasya carṣyādayaḥ pariśiṣṭānurūpā eva candrikāyāṃ ratnamālāyāṃ coktāḥ | sūryaścetyasya yājñikyupaniṣada ṛṣiḥ sūryamanyumanyupatayo rātryaśca devatā gāyatrīpaṅktivirājaśchandāṃsītyādiprakārāntaramāśvalāyanairnā''dartavyaṃ svagṛhyapariśiṣṭavirodhāt | ṛṣyādyuccāraṇe kramo bṛhaddevatānukramaṇikāyāmniyamo'yaṃ jape home ṛṣiścando'tha daivatam | anyathā cetprayuñjñānastatphalaṃ cātra hīyate || arthepsavaḥ khalvṛṣayaśchandobhirdevatāḥ purā | abhyadhāvanniti cchando madhye tvāhurmaharṣayaḥ || ṛṣiṃ tu prathamaṃ brūyācchandastu tadanantaram | devatāmatha mantrāṇāṃ karmasvevamiti śrutiḥ || tathā rāmavājapeyīyāṃ gṛhyākāro'piṛṣimādau prayuñjīta cchando madhye niyojayet | devatāmavasāne ca mantrajño mantrasiddhaye || sarvānukramaṇyāmapi - brāhmaṇāryeyacchandodaivatavidyājanādhyāpanābhyāṃ śreyo'dhigacchatīti| prācīnāstu ṛṣidaivatacchandāṃsyanukramiṣyāma iti sarvānukramavākyamathāsya mantrāṇāmṛṣidaivatacchandāṃsīti pariśiṣṭavākyaṃ ca kramabodhakaṃ manyamānāḥ prathamamṛṣistato devatā tataścanda evaṃ krameṇoccāraṇamāhuḥ | atha sandhyākālātikramaprāyaścittam | tatra skāndeudayāstamayādūrdhvaṃ yāvatsyādghaṭikātrayam | tāvatsandhyāmupāsīta prāyaścittamataḥ param || idaṃ ca śrāntaparam | anyathā prātaḥsandhyāṃ sanakṣatrāṃ nopāste yaḥ pramādataḥ | gāyatryaṣṭaśataṃ tasya prāyaścittaṃ viśuddhaye || iti karmapradīpavaco virodhāpatteḥ | prātaḥsandhyāṃ sanakṣatrāmiti sāyaṃsandhyā(dhyāṃ)tu sādityāmityetadupalakṣaṇamiti pṛthvīcandraḥ | tatra yamaḥprāṇāyāmatrayaṃ prātardviguṇaṃ saṅgave smṛtam | madhyāhne triguṇaṃ proktamaparāhne caturguṇam || sāyāhne pañcaguṇakaṃ sandhyātikramaṇe bhavet || yattu jāmadagnyavacanamsandhyākāle tvatikrānte snātvā''camya yathāvidhi | japedaṣṭaśataṃ devīṃ tataḥ sandhyāṃ samācaret