Acaracintamani 2.p46

2.p46

nirādhārāśca ye jīvāḥ pāpe dharme ratāśca ye | teṣāmāpyāyanāyetaddīyate salilammayā || kṛtopavītī devebhyo nivītī ca bhavettataḥ | manuṣyāṃstarpayed bhaktyā ṛṣiputrānṛṣīṃstathā || sanakaśca sanandaśca tṛtīyaśca sanātanaḥ | kapilaścāsuriścaiva voḍhuḥ pañcaśikhastathā || sarve te tṛptimāyāntu maddattenāmbunā sadā | marīcimatryaṅgirasau pulastyaṃ pulahaṃ kratum || pracetasaṃ vaśiṣṭhañca bhṛgunnāradameva ca | devān sarvānṛṣīn sarvāṃstarpayetākṣatodakaiḥ || apasavyaṃ tataḥ kṛtvā savyaṃ jānu ca bhūtale | agniṣvāttāṃstathā saumyān haviṣmatastathoṣmapān || sukālino barhiṣada ājyapāṃstarpayettataḥ | tarpayecca pitṝn bhaktyā, satilodakacandanaiḥ || darbhapāṇistu vidhinā hastābhyāntarpayettataḥ | pitrādīnnāmagotreṇa tathā mātāmahānapi || santarpya bhaktyā vidhivadimammantramudīrayet | ye bāndhavā'bāndhavā vā yenyajanmani bāndhavāḥ || te tṛptimakhilā yāntu yaścāsmattobhivāñchati