Ahnikaprakasha 8.p59

8.p59

padmapurāṇe, brahmāṇaṃ tarpayetpūrvaṃ viṣṇuṃ rudraṃ prajāpatim | devā yakṣāstathā nāgā gandharvāpsaraso'surāḥ || krūrāḥ sarpāḥ suparṇāśca taravo jambhakāḥ khagāḥ | vidyādharā jaladharāstathaivākāśagāminaḥ || nirādhārāśca ye jīvāḥ pāpe dharme ratāśca ye | teṣāmāpyāyanāyaitaddīyate salilaṃ mayā || kṛtopavītī devebhyo nivītī tu bhavettataḥ | manuṣyāṃstarpayet bhaktyā ṛṣiputrānṛṣīṃstathā || sanakaśca sanandaśca tṛtīyaśca sanātanaḥ | kapilaścāsuriścaiva voḍhuḥ pañcaśikhastathā || sarve te tṛptimāyāntu maddttenāmbunā sadā | marīcimatryaṅgirasau pulastyaṃ pulahaṃ kratum || pracetasaṃ vasiṣṭhaṃ ca bhṛguṃ nāradamevaca | devānbrahmaṛṣīn sarvān tarpayedakṣatodakaiḥ || apasavyaṃ tataḥ kṛtvā savyaṃ jānvācya bhūtale | agniṣvāttāṃstathā saumyan haviṣmantamayodhvapān || sukālino barhiṣadastathaiva hyājyapāḥ punaḥ | tarpayeta pitṝn bhaktyā salilodakacandanaiḥ || darbhapāṇistu vidhinā pretāṃstāṃstarpayettataḥ | pitrādīnnāmagotreṇa tathā mātāmahānapi || santarpya bhaktyā vidhivadimaṃ mantramudīrayet | ye'bāndhavā bāndhavā vā ye'nyajanmani bāndhavāḥ || te tṛptimakhilā yāntu yaścāsmatto'bhivāñchati