Acaramayukha 9.p15

9.p15

agaru śatasāhasraṃ dviguṇaṃ vā sitāhulam | guggulaṃ ghṛtasaṃyuktaṃ sākṣādgṛhṇāni śaṃkara. || tathā— tailenā'pi hi yo dadyāt ghṛtābhāvena mānavaḥ | saiva dīpapradānena śivavadrājate bhuvi || nandikeśvare—atha bhaktyā śivaṃ pūjyo naivedyamupakalpayet | yadyadevātmanaḥ śreyastaddīśāya prakalpayet || bhaviṣye tu—śālitaṇḍulaprasthaṃ tu kuryādannaṃ susaṃskṛtam | śivāya tu carūṃ dadyāccaturdaśyāṃ samāhitaḥ || śaivasarvasve skānde— etaccāmraphalaṃ pakkaṃ yaḥ śaṃbhorvinivedayet | varṣāṇāmayutaṃ bhogaiḥ śivaloke mahīyate || evaṃ mocāphalaṃ pakvaṃ yaḥ śivāya nivedayet | sarvabhakṣyamahābhogaiḥ śivaloke mahīyate || mocā kadalī| śivapurāṇe— naivedyaṃ ghṛtasaṃyuktaṃ madhuparkaṃ nivedayet | agniṣṭomasya yajñasya phalamāpnoti mānavaḥ || paripakvaṃ susaṃsṛṣṭamājyasiktaṃ susaṃskṛtam | śivāya māṃsaṃ dattvā tu śṛṇu yatphalamāpnuyāt || aśeṣaphaladānena yatphalaṃ parikīrtitam | tatphalaṃ prāpnuyānnityaṃ sarvaṃ māṃsanivedanāt || [ śivadharme ]—liṅgavedī bhaveddevī liṅgaṃ sākṣānmaheśvaraḥ | tayoḥ saṃpūjanātkhyātā devī devaśca pūjitau || devīpurāṇe—savyaṃ prajettato'savyaṃ praṇālaṃ naiva laṅghayet | ekībhūtamanā rudre yaḥ kuryātriḥ pradakṣiṇam || chinnastena bhavenmartyairna tasya punarudbhavaḥ | bhaviṣye—jānubhyāṃ caiva pāṇibhyāṃ śirasā ca vicakṣaṇaḥ | kṛtvā praṇāmaṃ deveśe sarvānkāmānavāpnuyāt || liṅgapurāṇe—gandhadhūpanamaskārairnṛttavādyaiśca sarvaśaḥ | yo māmarcayate tatra tadā tuṣyāmyahaṃ sadā