Danamayukha 3.p55

3.p55

mahādānamanuttamam | mahābhūtaghaṭaṃ nāma mahāpātakanāśanam || puṇyaṃ dinamathāsādya kṛtvā brāhmaṇavācanam| ṛtviṅmaṇḍapasambhārabhūṣaṇācchādanādikam || tulāpuruṣavat kuryāllokeśā''vāhanaṃ tathā | kārayet kāñcanaṃ kumbhaṃ mahāratnacitaṃ budhaḥ || mahāratnāni brahmoktāni | prādeśādaṅgulaśataṃ yāvatkuryātpramāṇataḥ | kṣīrājyapūjitaṃ tadvatkalpavṛkṣasamanvitam || padmāsanagatāṃstatra brahmaviṣṇumaheśvarān | lokapālān sahendrāṃśca svavāhanasamanvitān || varāheṇa dhṛtāṃ tadvat kṛtvā pṛthvīṃ sapaṅkajām | varuṇaṃ cāsanagataṃ kāñcanaṃ makaropari || hutāśanaṃ meṣagataṃ vāyuṃ kṛtamṛgāsanam | ṛgvedasyākṣasūtraṃ syād yajurvedasya paṅkajam || sāmavedasya vīṇā syāddhenuṃ dakṣiṇato nyaset| atharvavedasya punaḥ sruksruvau dakṣiṇe kare || purāṇavedo varadaḥ sākṣasūtrakamaṇḍaluḥ || atra kalpavṛkṣapratimāprādeśādiparimāṇasahitaghaṭasaṃpādaka suvarṇamānamārthikam| paritaḥ sarvadhānyāni cāmarā''sanadarpaṇam| pādukopānahacchatrabhūṣaṇācchādanādikam ||śayyāṃ ca jalakumbhām̐śca pañcavarṇaṃ vitānakam || jalakumbhāḥ ṣoḍaśa | snātvā'dhivāsanānte tu mantrametamudīrayet || mantraḥ prayoge jñeyaḥ | ityuccārya mahābhūtaghaṭaṃ yo vinivedayet | sarvapāpavinirmuktaḥ sa yāti paramāṃ gatim || vimānenārkavarṇena pitṛbandhusamanvitaḥ | stūyamāno varastrībhiḥ padaṃ prāpnoti vaiṣṇavam || ṣoḍaśaitāni yaḥ kuryānmahādānāni mānavaḥ| na tasya punarāvṛttiriha loke'bhijāyata iti