Danamayukha 3.p56

3.p56

śayyāpūrṇakumbhādisahitaṃ viṣṇudaivataṃ tulāpuruṣavat tredhā | tataḥ puṇyāhavācanagrahādipūjana-visarjanamaṇḍapādipratipādana-brāhmaṇabhojanāśīrvādagrahaṇamaṅgalācārādīni || iti mahābhūtaghaṭamahādānam || iti śrīmīmāṃsakabhaṭṭaśaṅkarātmajabhaṭṭanīlakaṇṭhakṛte dānamayūkhe ṣoḍaśamahādānāni || atha daśa mahādānāni | kaurme, kanakā'śvatilā nāgā dāsī rathamahīgṛhāḥ | kanyā ca kapilā dhenurmahādānāni vai daśa || vahnipurāṇe | rāma uvāca | krodhādikaṃ mayā karma kṛtaṃ munivarottamāḥ | kathaṃ tasmādvimucye'haṃ pāpāt prāṇivadhādikāt || ityuktā dharmatattvajñāḥ pāpānāṃ pāvanaṃ param || dānaṃ ceha suvarṇasya te tamūcurmaharṣayaḥ || vyāsaḥ | sarvān kāmān prayacchanti ye prayacchanti kāñcanam | etaddhi bhagavānatriḥ pitāmahasuto'bravīt || nandipurāṇe | tasmāt svaśaktyā dātavyaṃ kāñcanaṃ mānavairbhuvi | nātaḥ parataraṃ loke sadyaḥ pāpavimocanam || suvarṇasya suvarṇasya suvarṇaṃ yaḥ prayacchati | sarvapāpavinirmuktaḥ svargaloke mahīyate || ādyasuvarṇaśabdena hiraṇyamuktam | dvitīyena ca śobhanavarṇatvam | tṛtīyena parimāṇaviśeṣaḥ | suvarṇadvitayaṃ dattvā akṣayāṃ gatimāpnuyāt | dattvā suvarṇasya śataṃ dvijebhyaḥ śraddhayā'nvitaḥ | brahmalokamanuprāpya brahmaṇā saha modate || sakṛduccaritasuvarṇaśabdasya ṣoḍaśamāṣaviśiṣṭahemavāciteti prāguktam | suvarṇadāne deyasuvarṇasya tṛtīyaścaturtho vāṃśo dakṣiṇeti pūrvaṃ paribhāṣāyāmuktam | rajatamiti kecit | dānamantraḥ | hiraṇyagarbhagarbhastvaṃ hemabījaṃ vibhāvasoḥ | anantapuṇyaphaladamataḥ śāntiṃ prayaccha me || kaurme | palaikaṃ dviguṇaṃ vā'pi triguṇaṃ śaktyanukramāt | kanakaṃ syāt suvarṇena dvābhyāṃ tribhiḥ sadākṣiṇam || yatnādadho vā tat kuryāddakṣiṇā syād yathāruci || iti suvarṇadānam || ādityapurāṇe | ādityodayasamprāptau vidhimantrapuraskṛtam | dadāti kāñcanaṃ yo vai duḥsvapnaṃ pratihanti saḥ || dadātyuditamātre yastasya pāpmā vilīyate || vāyupurāṇe | guñjā guñjārddhamātraṃ vā niyataḥ prativāsaram | kanakaṃ nyasya liṅgaṃ tu vrajettatpadamuttamam || brahmāṇḍe | śṛṇuṣvāvahito dānaṃ bravīmi tava nārada | śatamānamiti proktaṃ sarvapāpapraṇāśanam || āyuṣyaṃ śrīkaraṃ puṇyam ārogyaṃ santatipradam | bhuktimuktipradaṃ svargyaṃ sarvamaṅgalakāraṇam || puṇyakāleṣu sarveṣu candrasūryagrahādiṣu | nityaṃ vā kārayed dānaṃ janmarkṣeṣu viśeṣataḥ || puṇyadeśeṣu sarveṣu gṛhe devālayeṣu ca | yatra sādhanasampattistatra dānaṃ samācaret || tathā, gavyena bhūmiṃśakṛtā jalena ālipya madhye sitatandulaiśca saroruhaṃ sundarakesarāḍhyaṃ savarṇikaṃ cāṣṭadalaṃ vilikhya || tasmin hiraṇyaṃ śatamānapātraṃ nidhāya tasyopari taṃ vicintya | brahmāṇamīśaṃ kamalāsanasthamārādhyagandhādibhirādareṇa || vipraṃ tathā vedavidāṃvariṣṭhaṃ vicintya buddhyā tu samarcayitvā | dadyāt suvarṇaṃ śatamānamasmai samprītayāmātmabhūrityudīryya | śatamānaṃ śatakṛṣṇalamāṣādyunmitam || iti śatamānadānam || atha rajatadānam || skānde | yaḥ prayacchati viprāya rajataṃ cā'pi nirmalam | sa vidhūyā''śu pāpāni svargaloke mahīyate || rūpavān subhagaḥ śrīmāniha lokeṣu jāyata, iti rajatadānam || athāśvadānaṃ skānde | aśvaṃ yastu prayacchedvai hemacitraṃ sulakṣaṇam | sa tena karmaṇā devi gāndharvaṃ lokamaśnute || bhārate | sarvopakaraṇopetaṃ yuvānaṃ doṣavarjitam | yo'śvaṃ dadāti viprāya svargaloke mahīyate || tathā, yāvanti romāṇi haye bhavanti hi nareśvara | tāvato vājidā lokān prāpnuvantīha puṣkalān || kālikāpurāṇe | aśvaṃ vā yadi vā yugmaṃ śobhane cā'tha pāduke | dadāti yaḥ pradhānaṃ vai brāhmaṇebhyaḥ susaṃyataḥ || tasya divyāni yānāni rathādhvajapatākinaḥ | duṣṭaḥ panthā nacaiveha bhaviṣyāti kadācana || atra divyayānasya duṣṭapathavirahasampattiryathākramaṃ pratyekaṃ phalaṃ jñeyam | kaurme | aśvaṃ tanmūlyamathavā kanīyo madhyamottamam | dadyād vittānusāreṇa tārāgaṇaparicchadam || śaphaiḥ pañcapalai raupyaiḥ suvarṇālaṅkṛtaṃ kramāt | sadakṣiṇaṃ savastraṃ ca brāhmaṇāyāgnihotriṇe || tārāgaṇastārānukāryalaṅkāraḥ | dānamantraḥ— uccaiḥśravāstvamaśvānāṃ rājñāṃ vijayakārakaḥ | sūryavāha namastubhyamataḥ śānti prayaccha me