Danamayukha 3.p66.1

3.p66.1

maṭhadānaṃ kāryaṃ, mārkaṇḍeye-kuryātpratiśrayagṛhaṃ pathikānāṃ hitā''vaham| nijagehaikadeśaṃ vā sādhūnāṃ yo nivedayet || akṣayaṃ puṇyamuddiṣṭaṃ tasya svargāpavargadam| sarvakāmasamṛddho'sau devavaddivi modate || bhaviṣyatpurāṇe'pi, pratiśraye suvistīrṇe kārite sajalendhane | dīnānāthajanārthāya vada kiṃ na kṛtaṃ bhavet || pratiśrayo dharmaśālā || iti pratiśrayadānam || atha kanyādānam || bṛhaspatiḥ | sahasrameva dhenūnāṃ śataṃ vā'naḍuhāṃ samam| daśānaḍutsamaṃ yānaṃ daśayānasamo hayaḥ || daśavājisamā kanyā bhūmidānaṃ tataḥ param | dadanti sarvapāpebhyo brahmalokaṃ vrajanti ta iti || devalaḥ | tisraḥ kanyā yathānyāyaṃ pālayitvā nivedya ca | na pitā narakaṃ yāti nārī vā strīprasūyinī || vasiṣṭhaḥ | hāṭakakṣitigaurīṇāṃ saptajanmānugaṃ phalam | dharmeṇa vidhinā dātuma sagotro'pi yujyate || skānde, ātmīkṛtya suvarṇena parakīyāṃ tu kanyakām|| ṛṣyaśṛṅgaḥ | varagotraṃ samuccārya prapitāmahapūrvakam | nāma saṅkīrtayedvidvān kanyāyāścaivameva hi || tiṣṭhet pūrvamukho dātā varaḥ pratyaṅmukho bhavet | madhuparkānvitāyaitāṃ tasmai dadyāt sadakṣiṇām || udapātraṃ tato gṛhya mantreṇānena dāpayet | gaurīṃ kanyāmimāṃ vipra yathāśakti vibhūṣitām | gotrāya śarmaṇe tubhyaṃ dattāṃ vipra samāśraya || bhūmiṃ gāvaśca dāsīśca vāsāṃsi ca svaśaktitaḥ | mahiṣyo vājinaścaiva dadyāt svarṇamaṇīnapi || tataḥ svagṛhyavidhinā homādyaṃ karma kārayet|yathācāraṃ vidheyāni māṅgalyakautukāni ca || kanyādātā prāṅmukho varaḥ pratyaṅmukhaḥ| dātodaṅmukho varaḥ pratyaṅmukha iti bhaṭṭacaraṇāḥ | ācaraśca ||