Danamayukha 3.p66.2

3.p66.2

atrāyaṃ prayogaḥ | varaṃ madhuparkeṇa sampūjya māsapakṣādyuktvā mama samastapitṝṇāṃ niratiśayasānandabrahmalokāvāptyādikanyādānakalpoktaphalāvāptaye'nena vareṇāsyāṃ kanyāyāmutpatsyamāna santatyā dvādaśāvarān dvādaśa parān puruṣān pavitrīkarttuma ātmanaśca śrīlakṣmīnārāyaṇaprītaye brāhmavivāhavidhinā kanyādānamahaṃ kariṣya iti saṅkalpya, kanyāṃ kanaka sampannāṃ kanakābharaṇairyutām dāsyāmi viṣṇave tubhyaṃ brahmalokajigīṣayā iti dadyāt | varastu, devasya tveti pratigṛhya svastītyuktvā svaśākhīyāṃ kāmastutiṃ paṭhet | evaṃ, na mametyādinā sampradada iyantena vākyena trirdadyāt | kanyādānapratiṣṭhārthaṃ suvarṇaṃ dakṣiṇāṃ bhūmidāsyādikaṃ yathāśakti dadyāt | viśrvambharaḥ sarvabhūtāḥ sākṣiṇyaḥ sarvadevatāḥ imāṃ kanyāṃ pradāsyāmi pitṝṇāṃ tāraṇāya ceti mantraṃ punarna mametyādi prītaya iyantamuktvā'mukapravarāyāmukagotrāyāmukaśarmaṇaḥ prapautrāyāmukaśarmaṇaḥ pautrāyāmukaśarmaṇaḥ putrāyāmukaśarmaṇe varāya śrīdhararūpiṇe'mukapravarāmamukagotrotpannāmamukaśarmaṇaḥ prapautrīmamukaśarmaṇaḥ pautrīmamukaśarmaṇaḥ putrīmamukanāmnīmimāṃ kanyāṃ śrīrūpiṇīṃ tubhyamahaṃ sampradada iti varahaste | vistarastu prayogaratne bhaṭṭacaraṇairuktaḥ || iti kanyādānam || skānde, vaivāhikapradānaṃ hi yo dadāti dayāparaḥ | vimānenā'rkavarṇena kiṅkiṇījālamālinā || mahendrabhavanaṃ yāti sevyamāno'psarogaṇairiti || vaivāhikaṃ vivāhopayogidravyavastrāsublaṅkārādīni vaivāhikadānam || atha kapilādānam | ādityapurāṇe, sahasraṃ yo gavāṃ dadyāt kapilāṃ cāpi suvrata | samameva purā prāha brahmā yatnavidāṃ varaḥ|